Գեղարքունիքի մարզի դատավորներին չեն դատի իրենց նախկին աշխատավայրում

Գեղարքունիքի մարզի ընդհանուր իրավասության դատարանի նախագահի, նույն դատարանի դատավորի, մարզի դատախազի վերաբերյալ գործն ուղակվել է Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան: Այս մասին Yerkir.am-ը տեղեկացավ դատական տեղեկատվական համակարգից:

Նշենք, որ մեկ ամսվա ընթացքում այս գործով արդեն երեք դատավոր է ինքնաբացարկ հայտնել, քանի որ գործով մեղադրյալներից մի քանիսի հետ գտնվել են մտերիմ հարաբերությունների մեջ: Խոսքը վերաբերում է Գեղարքունիքի մարզի դատարանի դատավորներ Վահագն Մելիքյանին, Վարդան Հարությունյանին և Յուրիկ Իսկոյանին, ովքեր հրաժարվում էին դատել իրենց գործընկերներին:

Ի դեպ, իրավական շրջանակներում բազմաթիվ քննարկումների առիթ է դարձել դատավորին իր նախկին աշխատավայր հանդիսացող դատարանում դատելու հարցը: Հիշենք կաշառք ստանալու համար դատապարտված` Լոռու մարզի ընդհանուր իրավասության դատարանի դատավոր Խաչատուր Խաչատրյանի կամ կաշառք ստանալու մեջ մեղադրվող` Շենգավիթի դատարանի նախկին դատավոր Իշխան Բարսեղյանի գործերը:

Բարսեղյանի պաշտպան Վարդուհի Էլբակյանը մի առիթով նկատել էր, որ բարոյական չէ դատավորին դատել այն դատարանում, որտեղ նա 20 տարի աշխատել է:

Նշենք, որ քրեական գործը պետք է քննվի այն դատարանի կողմից, որի դատական տարածքում ավարտվել է քրեական գործով մինչդատական վարույթը: Իսկ Գեղարքունիքի մարզի դատարանի դատավորների դեպքում քրեական գործով նախաքննություն իրականացվել է ՀՀ հատուկ քննչական ծառայության կողմից, և քրեական գործով մինչդատական վարույթն ավարտվել է ՀՀ հատուկ քննչական ծառայությունում:

Հաշվի առնելով այն հանգամանքը, որ ՀՀ հատուկ քննչական ծառայությունը գտնվում է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի դատական տարածքում, Գեղարքունիքի մարզի ընդհանուր իրավասության առաջին ատյանի դատարանի դատավոր Մնացական Հարությունյանը հարկ է համարել, որ վերը նշված քրեական գործը ընդդատյա է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանին և այն պետք է ուղարկել ըստ ընդդատության` վերը նշված դատարան:

Ասել է թե, Գեղարքունիքի մարզի դատարանի նախկին դատավորներին ստիպված չեն լինի դատել իրենց նախկին աշխատավայրում, իսկ արդյո՞ք Արաբկիրի դատարանի համապատասխան դատավորը գործը կընդունի վարույթ, դեռևս պարզ չէ: Չի բացառվում, որ, օրինակ, Արաբկիրի դատարանի դատավորն էլ պարզի, որ մտերմիկ հարաբերություններ է ունեցել տվյալ դատավորների հետ:

Նշենք, որ առանձնապես խոշոր չափերով կաշառք ստանալու, կաշառք տալու և կաշառքի միջնորդության բազմաթիվ դրվագներով գործում ներգրավված է 13 անձ, այդ թվում` դատական իշխանության երկու ներկայացուցիչ` Գեղարքունիքի մարզի ընդհանուր իրավասության դատարանի նախագահը, նույն դատարանի դատավորը, ինչպես նաև մարզի դատախազության դատախազը: