Ես էլ կարող եմ լինել վարչապետ. Հակոբ Հակոբյան

Այսօր խորհրդարանում լրագրողները ՀՀԿ խմբակցության պատգամավոր Հակոբ Հակոբյանից հետաքրքրվեցին վարչապետի մեկ տարվա գործունեության արդյունքների մասին: Նա նշեց, որ երբ համեմատում է պետական բյուջեում կամ քաղաքական ծրագրերում ունեցած պարտավորությունները և բյուջեով ձեռք բերված փաստացի կատարողականի ցուցանիշները, վարչապետի աշխատանքի գնահատականը պարզ է դառնում:

Դիտարկմանը՝ հանրապետականները վարչապետի հեռանալու օրերն են հաշվում, քանի որ նա, ըստ լուրերի, 2018-ից այլևս չի լինի վարչապետ, պատգամավորն արձագանքեց. «Ո՞վ ասաց: Ես եմ հանրապետական, ես տենց օրեր չեմ հաշվում, ես նման բան ասե՞լ եմ»:

Ինչ վերաբերում է ԱԺ փոխխոսնակ Շարմազանովի հայտարարությանը, թե վարչապետն այլ լիազորություններ է ունենալու 2018 թվականից, նա նշեց, որ, իհարկե, այլ լիազորություններ է ունենալու, որովհետև նոր Սահմանադրությունն է ուժի մեջ մտնելու: Հ

Հարցին՝ պնդո՞ւմ է, որ Կարեն Կարապետյանն է լինելու 2018 թվականին վարչապետի թեկնածուն, Հակոբյանը պատասխանեց. «Ուրեմն Հանրապետականն այսօր իշխող կուսակցությունն է: ԱԺ-ն 2018 թվականից դառնալու է համար մեկ պետական մարմինը, և ՀՀԿ-ն` որպես առաջին քաղաքական ուժ, ԱԺ-ում իր որոշումը կունենա այն ժամանակ, երբ կավարտվեն հանրապետության նախագահի լիազորությունները»:

Ճշգրտող հարցին՝ Կարեն Կարապետյանը կարո՞ղ է լինել հաջորդ վարչապետը, նա պատասխանեց. «Ես էլ կարող եմ լինել, բոլորն էլ կարող են լինել: Բայց կուսակցությունը կունենա որոշում, եթե Սերժ Սարգսյանն ուզենա ինքն անպայման լինել, որովհետև ինքն է կուսակցության ղեկավարը, և տվյալ պարագայում կուսակցության ղեկավարը պետք է լինի պատասխանատուն»:

Ինչ վերաբերում է հարցին` արդյո՞ք վարչապետի թեկնածուի ընտրությունը միանձնյա որոշմամբ է լինելու, պատգամավորը պատասխանեց, որ դա կուսակցության որոշումն է լինելու, և իրենք քվեարկելու են:

Հակոբյանը նաև նշեց, որ չի կարող այնպիսի բան լինել, որ իր և կուսակցության թեկնածուն տարբեր մարդիկ լինեն, և ինքը կանգնի երկընտրանքի առաջ: «Հանրապետականը մեկ որոշում է կայացնում՝ ով է լինելու վարչապետի թեկնածուն»,- շեշտեց նա:

Հարցին՝ թեկնածուին Սերժ Սարգսյա՞նը կներկայացնի, նա արձագանքեց, որ այդ հարցը պետք է տալ Սերժ Սարգսյանին: Հարցին էլ՝ եթե նախագահը միանձնյա որոշի, իրենք կո՞ղմ են քվեարկելու, պատասխանեց՝ իհարկե:

Դիտարկմանն ի պատասխան, թե ստացվում է ՀՀԿ-ն մեկ անձի կուսակցություն է, ծիծաղով արձագանքեց, ապա ասաց՝ ոչ: