Խոսրովի անտառը ինչպես եղել է, այդպես էլ մնալու է արգելոց. նախարար

Բնապահպանության նախարար Արծվիկ Մինասյանը «Ազատություն» ռադիոկայանի ֆեյսբուքյան ասուլիսում նշեց, որ արգելոցային ռեժիմում մարդու միջամտությունմ օրենքով արգելված է: Նախարարը միևնույն ժամանակ հայտնեց, որ քննարկում են «Խոսրովի անտառ» պետական արգելոցի կառավարման նոր պլանը:

«Ցանկանում ենք արգելոցի տարածքում ընդգրկել այնպիսի տարածքներ, որոնք ունենան ավելի թույլ ռեժիմ, ինչպիսին արգելավայրային ռեժիմներն են, և որտեղ` առանձին տեղերում, թույլատրվում են վերականգնողական աշխատանքներ, բայց բուն արգելոցի տարածքում օրենքի պահանջ է, որ չի կարող որևէ ձևով արհեստական կամ մարդու միջամտությամբ բուսածածկ տարածք վերականգնվել»,- շեշտեց նա:  

Հարցին` հնարավո՞ր է` արգելոցի մոխրացած տարածքը հետագայում հանձնվի որևէ այլ կազմակերպության,պատասխանեց, որ օրենքի պահանջ է, որ որևէ միջամտություն արգելոցում չլինի, և հակառակը` կառավարման նոր պլանով նախատեսվում է ընդլայնել հատուկ պահպանվող տարածքի սահմանները:

«Վստահեցնում եմ մեր հանրությանը` «Խոսրովի անտառ» պետական արգելոցը 60 տարի ինչպես արգելոց եղել է, շարունակելու է լինել»,- հայտարարեց նախարարը:

Ինչ վերաբերում է հրդեհի պատճառներին, ապա նա ընդգծեց, որ հրդեհի առաջացման պատճառների մասով հարուցված է քրեական գործ, և որ մեղավոր անձինք կկրեն խիստ պատիժներ: Հրդեհի կանխամտածված լինելու մասին խոսակցություններն էլ Մինասյանը համարեց անհնարին և բացառեց դա: