Խնդիրներ` թանգարաններում

Ինչպես հաղորդում է ՀՀ մշակույթի  նախարարության մամուլի ծառայությունը, այսօրվա թռուցկաժողովում մշակույթի նախարար Արմեն Ամիրյանը հանձնարարեց մանրակրիտ ուսումնասիրել և հաշվետվություն կազմել, թե Հայաստանի պետական ո′ր թանգարանների ո′ր նմուշներն են վերջին տարիներին ցուցադրվել օտար երկրներում և ի′նչ պայմաններով.
«Եթե կիրառվել է փոխադարձության սկզբունքը, այսինքն, եթե փոխադարձաբար նմուշներ են բերվել և նույն պայմաններով ցուցադրվել Հայաստանում՝ պետք է դա արձանագրել։ Իսկ եթե գումարով են տրվել օտար երկրներում ցուցադրության՝ պարզել, թե դրանով որքա′ն գումար են վաստակել մեր թանգարանները, և որտե′ղ են այդ գումարները։ Եթե չկա գումար, սա արդեն խնդիր է, իսկ եթե չկա թե′ փոխադարձություն, թե′ գումար, սա արդեն շատ լուրջ խնդիր է»։