Տարոն Մարգարյանը չի շտապում «պատժել» Գալուստ Սահակյանի հարսին

Օրերս մամուլը գրել էր, որ Երևանի քաղաքապետ Տարոն Մարգարյանն ընտրություններից առաջ պետբյուջեի հաշվին գումարներ է հատկացնում մայրաքաղաքի տարբեր վարչական շրջանների բնակիչներին: Այսօր մի քանի լրագրողներ քաղաքապետից հետաքրքրվեցին` արդյո՞ք ընտրություններից առաջ նման հատկացումները չեն դիտվի որպես քաղաքացիներին ուղղորդում:

«Համայնքային բյուջեում սոցիալապես անապահովների համար նախատեսված են գումարներ, և ըստ վարչական շրջանների քաղաքացիների դիմումների՝ ուսումնասիրում ենք և տրամադրում: Դա ոչ այսօր է եղել, ոչ` երեկ, դա միշտ էլ եղել է: Տեղական ինքնակառավարման մարմիններն իրենց աշխատանքն են շարունակում, պետք չէ այդ աշխատանքն ընտրությունների հետ կապել»,-պատասխանեց նա:

Քաղաքապետն անդրադարձավ նաև թիվ 38 մանկապարտեզի տնօրեն Սեդա Հակոբյանի վերաբերյալ` մեծ աղմուկ բարձրացրած ձայնագրությանն ու այն տեղեկությանը, որ նա հրահանգում է իր ենթակայությամբ աշխատող մարդկանց, որ մարզերում ապրող իրենց հարազատներին վերագրանցեն թիվ 2 ընտրատարածքում:

Yerkir.am-ի հարցին` արդյ՞ոք քաղաքապետարանը «պատժելու» է քաղաքապետարանի ենթակայության տակ գտնվող մանկապարտեզի տնօրենին, Մարգարյանը պատասխանեց. «Պետք է հասկանանք՝ արդյո՞ք աշխատանքի ժամին է դա տեղի ունեցել, թե՞ աշխատանքից հետո: Երբ որ հասկանանք` աշխատանքի ժամին, թե` աշխատանքից հետո, այդ ժամանակ նոր քայլեր կձեռնարկենք»:

Մեր ճշտող հարցին՝ այսինքն` մինչ օրս չե՞ք ուսումնասիրել, քաղաքապետը պատասխանեց. «Այո, դեռ չենք պարզել»:

Նշենք, որ Սեդա Հակոբյանը ՀՀ կառավարությանն առընթեր պետական գույքի կառավարման վարչության պետ Արման Սահակյանի կինն է: Իսկ Արման Սահակյանը, ով ԱԺ նախագահ Գալուստ Սահակյանի որդին է, ՀՀԿ ռեյտինգային ցուցակով պատգամավորի թեկնածու է առաջադրվել թիվ 2 ընտրատարածքում: