Պալմիրայի հուշարձանների ոչնչացումը ռազմական հանցագործություն է. ՅՈՒՆԵՍԿՕ

ՅՈՒՆԵՍԿՕ-ի գլխավոր տնօրեն Իրինա Բոկովան Twitter-ի իր էջում դատապարտել է սիրիական Պալմիրա քաղաքի տետրապիլոնի ոչնչացումը «Իսլամական պետություն» ահաբեկչական խմբավորման գրոհայինների կողմից` դա կոչելով նոր ռազմական հանցագործությունը. հայտնում է РИА Новости-ն:

«Դա նոր ռազմական հանցագործություն է և անդառնալի կորուստ Սիրիայի ժողովրդի ու մարդկության համար»,- հայտարարել է նա:

Պալմիրան ՅՈՒՆԵՍԿՕ-ի համաշխարհային ժառանգության ցուցակում ընդգրկված` Սիրիայի 6 օբյեկտներից մեկն է: Քաղաքը եղել էր հնագույն քաղաքակրթության հարուստ  կենտրոններից մեկը: ԻՊ-ի առաջին հարձակումից հետո այն 80 տոկոսով պահպանվել էր, թեև ահաբեկիչները պայթեցրել էին Բելի տաճարը, Հաղթական կամարը և դամբարանների դաշտի սյուները: 2016-ի դեկտեմբերին ԻՊ-ի գրոհայիններին դարձյալ հաջողվեց գրավել Պալմիրան: