Չմշակվող հողերի խնդիրը կփորձեն լուծել՝ ջրային ենթակառուցվածքների հարցը լուծելով

Այսօր գյուղատնտեսության նախարար Իգնատի Առաքելյանը լրագրողների հետ զրույցում անդրադարձավ չմշակվող հողերի խնդրին: Նա նշեց, որ հողերը չեն մշակվում, որովհետև չկան ոռոգման պայմաններ, այսինքն` չկան ենթակառուցվածքներ հողերի մշակման համար, ուստի քննարկումներ են սկսել ջրային պետական կոմիտեի, դոնոր կազմակերպությունների հետ` այդ խնդիրը լուծելու համար:

«Կփորձենք կոնսոլիդացնել ռեսուրսները` ապահովելու համար առաջնային ենթակառուցվածքներ, որ մարդիկ կարողանան հողերը ոռոգել»,- ասաց նախարարը՝ հավելելով, որ եթե ոռոգման պայմաններ ստեղծելուց հետո էլ գյուղացին կշարունակի չմշակել հողը, այդ ժամանակ կքննարկեն մեխանիզմներ` ինչ անել այդ դեպքերի համար:

«Ես չեմ ուզում ասել, որ աշխարհը շուռ կտամ, բայց անելու ենք ամեն ինչ, որ քայլ առ քայլ գանք նրան, որ գյուղատնտեսությունը զարգանա: Ցավոք, սա այն ոլորտն է, որտեղ վայրկյանական չեն կատարվում փոփոխությունները, անհրաժեշտ են մեծ ռեսուրսներ»,- ասաց նախարարը: