Ադրբեջանում տնտեսական անկումը կազմել է 3,9%

ՀՆԱ-ի անկումը Ադրբեջանում հունվար-նոյեմբերին, նախորդ տարվա նույն ժամանակահատվածի համեմատ, ադրբեջանական մանաթով արտահայտված, կազմել է 3,9%: Ոչ նավթային սեկտորի անկումը կազմել է 5,6%: Իսկ մեկ շնչին ընկնող ՀՆԱ-ն նվազել է 5%-ով:

Գնաճի մակարդակը շարունակում է բարձր մնալ Ադրբեջանում, որտեղ սպառողական գների ինդեքսը կազմել է 112,1%: Գնաճի բարձր տեմպերը պայմանավորված են եղել պարենամթերքի 14,1%, ոչ պարենային ապրանքների 16,8% և բնակչությանը մատակարավող վճարովի ծառայությունների սակագների 5,6% աճով: Իրականում խոսքը 30% գնաճի մասին է: Ադրբեջանն ԱՊՀ երկրների շարքում ամենաբարձր գնաճ ունեցող երկիրն է:

28%-ով նվազել են ուղղակի ներդրումները ֆիքսված կապիտալում, հիմնականում` շինարարության ոլորտում կատարված ներդրումների կրճատման հաշվին: Այսինքն` ՀՆԱ-ի անկմանը հիմնականում նպաստում է շինարարության ոլորտում կատարված աշխատանքների ծավալների նվազումը:

Ներկայացնենք ևս մի քանի ցուցանիշներ: Արդյունաբերությունը անկում է գրանցել 0,6%-ով, իսկ գյուղատնտեսության ոլորտը գրանցել է 2,3% աճ: Ցածր` 1,7% աճ է գրանցվել առևտրի շրջանառության ծավալներում, իսկ ծառայությունների ոլորտը գրանցել է 0,1% անկում:

Ադրբեջանի պետական բյուջեի եկամուտները հունվար-նոյեմբերի դրությամբ նվազել են 16,1%-ով, իսկ բյուջեի ծախսերը կրճատվել են 10%-ով: Բյուջեի եկամուտները նվազել են հարկային ոլորտում հավաքագրվող եկամուտների նվազման արդյունքում, դա պայմանավորված է ձեռնակությունների փակմամբ, նաև նավթի եկամուտների նվազման արդյունքում կրճատվող հարկերի նվազման փաստով:

Միաժամանակ, ըստ Ադրբեջանի պետական մաքսային կոմիտեի տվյալների, հունվար-հոկտեմբեր ժամանակահատվածում կրճատվել են արտաքին առևտրի ծավալները` մոտ 13,4%-ով, որտեղ արտահանման ծավալները նվազել են 16,9%-ով, իսկ ներմուծումը կրճատվել է 8,2 %-ով: Արտաքին առևտրի պրոֆիցիտը 10 ամիսների կտրվածքով կազմել է 237,7 մլն դոլար:

Հիշեցնենք, որ մինչև այս տարվա  օգոստոս ամիսը Ադրբեջանում գրանցվում էր արտաքին առևտրի պակասուրդ (դեֆիցիտ):