Սևան Նիշանյանը 7 օրով ազատ է արձակվել

Պոլսահայ գրող և լեզվաբան Սևան Նիշանյանը, ով արդեն մեկ տարի է` գտնվում է Այդըն Ենիփազարի փակ բանտում, կտեղափոխվի Սուլթանհիսար բաց բանտը:

Նիշանյանը, ով սեպտեմբերի 12-ին իր ֆեյսբուքյան էջում հայտնել էր, որ 7 օրով ազատ է արձակվել, «Ակօս»-ի հետ զրույցում պատմել է նոր բանտի պայմանների մասին: Նրա խոսքով՝ նոր բանտում պայմաններն ավելի լավն են, քան` նախորդում. ավելի ազատ է շրջում տարածքում, իսկ դռան մոտ անընդհատ պահակ չի կանգնում:

«Օրվա ընթացքում այգում ազատ զբոսնում եմ: Հիվանդանոց կամ այլ տեղ գնալու ժամանակ հատուկ միջոցներ չեն ձեռնարկվում: Բացի այդ` երեք ամիսը մեկ թույլատրում են օրվա ընթացքում հեռախոսազանգ կատարել` ըստ ցանկության»,- ասել է նա:

Նիշանյանը նաև մի շարք նորություններ է հայտնել իր նոր բառարանի և ծրագրերի մասին, որոնց ուղղությամբ աշխատանքներն իրականացնում է հենց բանտում: «Ավարտեցի բառարանի հետ կապված աշխատանքներս: Երկուսուկես տարի դրա վրա էի աշխատում, ի վերջո, ավարտեցի: Հիմա էլ թուրքերեն լեզվի վերաբերյալ մի ծրագիր եմ մշակում: Արդեն հասցրել եմ կեսն անել, շուտով դա էլ կավարտեմ: Մեծ և գեղեցիկ ծրագիր է»,- նշել է Սևանը:

Հիշեցնենք, որ Նիշանյանին 11 տարի ազատազրկելու որոշում է կայացվել՝ «ապօրինի շինություն կառուցելու» և «կնիք կեղծելու» մեղադրանքով: