Կարեն Կարապետյանը մակարդակ անձնավորություն է. տնտեսագետ

Երկրի տնտեսությունը ծանր վիճակում է, և դա բոլորիս հայտնի է. այսօր լրագրողների հետ զրույցում ասաց տնտեսագետ Վարդան Բոստանջյանը:

Ըստ նրա` իշխանությունները հանգել են այն եզրակացությանը, որ այլընտրանք չկա, և հարկավոր է ճակատային ճեղքում իրականացնել և տնտեսությունը հանել այս ծանր իրավիճակից: «Ազգային ժողովում քննարկվող` կառավարության ծրագիրն էլ հենց դրա համար է:  Ծրագրի ամրագրումները հրատապ ու կարևորագույն հարցեր են շոշափում, և, բնականաբար, այսօր ԱԺ-ում քննարկվող ծրագիրը կարելի է, ընդհանուր առմամբ, այդպիսին գնահատել»,- ասաց տնտեսագետը:

Բոստանջյանի խոսքով` կառավարության այս ծրագիրը տարբերվող է: «Ներդրումային ինստիտուտ` դա ցանկացած երկրի զարգացման կարևոր ատրիբուտն է:  Երկրորդ կարևոր գործոնը` տնտեսվարող սուբյեկտները գործարար աշխարհի հետ պետք է գործընկերային կապեր հաստատեն: Այստեղ դա էլ է շեշտադրված»,- նշեց տնտեսագետը` հավելելով, որ այս երկու կարևոր հանգամանքին գումարվում է նաև Կարեն Կարապետյանի գործոնը:

Ըստ Բոստանջյանի` Կարեն Կարապետյանն իսկապես արժանի է դրական խոսքերի իր անցած ուղու համար: Տնտեսագետը նաև նշեց, որ Կարեն Կարապետյանը «մակարդակ անձնավորություն է»: