Ամպագոռգոռ բաներ չեմ ուզում ասել. վարչապետը կարեւորեց առողջ ապրելակերպը

ՀՀ վարչապետ Կարեն Կարապետյանն այսօր կառավարության նիստում մի հանձնարարական տվեց, որը վերաբերում էր սպորտի և երիտասարդության հարցերի ոլորտին: Նա հանձնարարեց սպորտի և երիտասարդության նախարարին` 10-օրյա ժամկետում ուսումնասիրել մարզական հասարակական կազմակերպություններում մարզական բնույթի միջոցառումներ կազմակերպելու, պարգևատրումներ կատարելու համար պետական բյուջեից միջոցներ հատկացվելու դեպքում գումարների ծախսման արդյունավետությունը, ուսումնասիրել առհասարակ այդ ծախսերի հիմնավորվածությունը և կրճատել անաարդյունավետ ու չհիմնավորված ծախսերը:

«Ծախսերի կրճատման արդյունքում խնայված միջոցները սպորտի և առողջ ապրելակերպի մասսայականացմանն ուղղելու նպատակով ներկայացնել միջոցառումների ծրագիր և գումարներ»,- հանձնարարեց Կարեն Կարապետյանը՝ հավելելով, որ  ամեն օր պետք է զգանք, որ մասսայական սպորտի, առողջ ապրելակերպի ուղղությամբ քայլեր են կատարվում:

Վարչապետի խոսքով՝ հանձնարարվել նախարարին, որ նա ծրագիր ներկայացնի: «Ամպագոռգոռ բաներ չեմ ուզում ասել, բայց պետք է նույնիսկ ազգային ծրագիր, հանրապետական ծրագիր, որպեսզի դա դառնա մեր ապրելաոճը»,- ասաց նա: