Թուրք մարզասերները կարող են զրկվել Ռիո 2016-ի խաղերը դիտելու հնարավորությունից

Օգոստոսի 5-ից 21-ը Բրազիլիայի Ռիո դե Ժանեյրո  քաղաքում կայանալիք 2016 օլիմպիական խաղերը Թուրքիայում հնարավոր է չցուցադրվեն: Թուրքական «Haberler.com» լրատվակայքի տեղեկացմամբ՝ թուրքական պետական «TRT» հեռուստաընկերությունը չի կարողացել համաձայնության գալ «Saran Grup» ընկերության հետ, որին էլ պատկանում է օլիմպիական խաղերը Թուրքիայում  հեռարձակելու իրավունքը. տեղեկացնում է Ermenihaber-ը:

Աղբյուրի վկայությամբ՝ «TRT»-ն չափազանց թանկ է համարել խաղերի հեռարձակման իրավունքի տրամադրման դիմաց «Saran Grup»-ի պահանջած գումարը:

Առայժմ որևէ այլ թուրքական հեռուստաընկերություն ձեռք չի բերել Ռիոյի օլիմպիական խաղերը ցուցադրելու իրավունքը: Եթե երկու ընկերություններն  առաջիկա օրերին համաձայնության չգան, Թուրքիայի մարզասերները կզրկվեն Ռիո 2016-ը դիտելու հնարավորությունից: