Մի\' զարմացեք. սա հայկական ֆուտբոլն է

Եվրագավաթների որակավորման առաջին փուլի առաջին հանդիպումներից հետո մեր թիմերն արդեն հասցրել են անակնկալ գրանցել:  Անակնկալ, բայց ոչ հայ ֆուտբոլասերի համար: Ավանդույթի համաձայն մեր թիմերը շարունակում են իրենց տխուր ելույթները եվրագավաթների խաղարկությունում:

Սակայն, ամենատխուրն այն է, որ  այս ավանդույթը գնալով դառնում է ավելի տխուր:  Որակավորման առաջին փուլերի առաջին խաղերում Հայաստանի 4  թիմերից և ոչ մեկը հաղթանակ չտարավ: Չեմպիոնների լիգայի խաղարկությունում «Ալաշկերտ»-ը ոչ-ոքի (0:0) խաղաց Անդորրայի «Սանտա Կոլամա»-ի հետ: «Բանանց»-ը  0:1 հաշվով պարտվեց կիպրոսյան «Օմոնիա»-ին, «Շիրակ»-ը նույն հաշվով զիջեց վրացական «Դիլա»-ին, դե իսկ «Փյունիկ»-ը 0:2  հաշվով պարտվեց ոչ ավել, ոչ պակաս` Ջիբրալթարը ներկայացնող «Եվրոպա»-ին: 

 ԵԼ-ի առաջին փուլի ամենամեծ սենսացիան թերևս գրանցեց  հենց  «Փյունիկ»-ը:  Ջիբրալթարը ներկայացնող «Եվրոպա»-ի հետ խաղում երևանյան թիմն արդեն առաջին խաղակեսում 2 գնդակ բաց թողեց սեփական դարպասը:  Երկրորդ խաղակեսում Սարգիս Հովսեփյանի թիմը մնաց 10 հոգով: Երկրորդ դեղինի արդյունքում խաղադաշտից հեռացվեց Սերոբ Գրիգորյանը:

Հատկանշական է, որ «Եվրոպա» ակումբը, որը 3-րդ տարին անընդեջ հանդես էր գալիս Եվրոպա լիգայի խաղարկությունում, չէր կարողացել գրավել մրցակիցների դարպասը:

2014/15 մրցաշրջանում ջիբրալթարական թիմը ընդհանուր 0:4 հաշվով պարտվել է Լիխտենշտեյնի «Վադուց»-ին, իսկ նախորդ տարի ընդհանուր 0:9 հաշվով պարտվել է Սլովակիան ներկայացնող «Սլովան»-ին:  

Մեկ անգամ չէ, որ «Փյունիկ»-ի գլխավոր մարզիչ Սարգիս Հովսեփյանը խոսել է ակումբի քաղաքականության մասին: Այն է ` ֆուտբոլիստներ պատրաստել ազգային հավաքականի համար: Ցավալի է, բայց  կարելի է մի պահ պարզապես պատկերացնել Հայաստանի հավաքականի ապագան:  

Այնուամենայնիվ, արդեն 6 թիմ ունեցող Հայաստանի Բարձրագույն խմբի առաջնությունը ոչնչով չի զիջում ֆուտբոլային ամենագաճաճ երկրներին: Հետաքրքրաշարժ է, որ խաղից մեկ շաբաթ առաջ միջազգային բուքմեյքերները «Եվրոպա»-ի հաղթանակը գնահատում էին  50-60 գործակցով:  Կարելի է պատկերացնել, թե ինչ անակնկալ է մատուցել երևանյան թիմը արտասահմանցի  մասնագետներին, սակայն զարմանալ պետք չէ. սա հայկական ֆուտբոլն է: 

Երվանդ Հակոբյան