Թուրքիայում 6 երկրների համատեղ զորավարժություններ են անցկացվել

Թուրքիայում 6 երկրների համատեղ զորավարժություններ են անցկացվել: Թուրքական TRT-ի կայքի տեղեկացմամբ՝ Ադրբեջանի, Հունգարիայի, Ռումինիայի, Սաուդյան Արաբիայի և միջազգային ճանաչում չունեցող Հյուսիսային Կիպրոսի թուրքական հանրապետության մասնակցությամբ` Işık- 2016 խորագիրը կրող միջազգային զորավարժությունները սկսվել են հունիսի 20-ին:

Ըստ Ermenihaber-ի՝ նշյալ զորավարժությունները անցկացվում են 2009թ.-ից՝ օդուժի, ցամաքային և ծովային ռազմական ուժերի մասնակցությամբ: Դրանց նպատակը հնարավորինս իրական ռազմական իրավիճակների վերարտադրությունն ու այդ իրավիճակներում ռազմական ուժերի պատրաստվածության բարձրացնում է: Վարժություններն անցկացվել են մշակված սցենարով, որը ներառում է ռազմական գործողություններ և փրկարարական աշխատանքներ:

Զորավարժությունների վերաբերյալ կազմակերպված մամուլի ասուլիսի ժամանակ փոխգնդապետ Էմին Իլքեր Քուրթը նշել է, որ դրանք անցկացվում են տարեկան երկու փուլով՝ օդուժի հրամանատարության վերահսկողությամբ: Զորավարժության մասնակիցների թիվը արտասահմանից կազմել է 193, Թուրքիայից՝  357: