ԱԳԼՃԿ ոլորտում լուրջ ստուգումներ են իրականացվում. Լևոն Խալիկյան

Շուկայի վերահսկողության տեսչական մարմնի ղեկավար Լևոն Խալիկյանն այսօր լրագրողների հետ զրույցում ասաց` քանի որ Հայաստանն անդամակցում է ԵՏՄ-ին, այդ միության կողմից կան հաստատված նոր ստուգաթերթեր, որոնք տեսչությունը պետք է իրականացնի` ստուգումներով:

«Որպեսզի տնտեսվարող սուբյեկտների համար այդ ստուգումները չլինեն անակնկալ,  մենք կազմակերպել ենք քննարկում նրանց հետ, որպեսզի նրանք հասկական, թե նախկինի հետ ինչ տարբերություններ կան, և օրենքի որ կետով պետք է շարժվեն»,- ասաց Խալիկյանը` հավելելով, որ տեսչության գլխավոր նպատակը ստուգում իրականացնելը չէ, տուգանելը չէ:

«Տեսչությունը որոշել է իրազեկման տարբերակով ոլորտային  հանդիպումներ կազմակերպել բոլոր այն տեղերում, որտեղ կազմակերպվելու է վերահսկողություն: Օրինակ`նախկինում խաղալիքներ  ներմուծող կամ մասնագիտացված խանութ-սրահները, որոնք զբաղվում էին խաղալիքի վաճառքով, ունեին իրենց տեխնիկական կանոնակարգը, ըստ որի`  իրականացնում էին համապատասխան մակնշում և սերտիֆիկացում: Նախկինում խաղալիքների վրա չէր նշվում արտադրման ամսաթիվը, այժմ`փոփոխություններից հետո,  նշվում է նաև արտադրման ամսաթիվը:  Կա նաև Մաքսային միության նշան, որը հավաստում է, որ այդ խաղալիքը համապատասխանում է Մաքսային միության ողջ  տարածքում գործող` խաղալիքների անվտանգ լինելու մասին  օրենքին»,- նշեց Խալիկյանը:

Ըստ նրա` ցանկացած ժամանակ տնտեսվարող սուբյեկտներին առաջարկվում է դիմել տեսչություն, որտեղ կներկայացվեն օրենքի  պահանջները` թղթային և էլեկտրոնային տարբերակներով:

Լևոն Խալիկյանը խոսեց նաև խաղալիքների վաճառքին վերաբերող փոփոխությունների մասին: «Վաճառք իրականացնող ցանկացած ընկերություն պարտավոր է առաջին իսկ պահանջի դեպքում ներկայացնել սերտիֆիկատ:  Ցանկացած խաղալիքի վրա  պետք է լինի մակնշում` ռուսերեն և հայերեն լեզուներով, որը պետք է  ներառի տեղեկություն այն մասին, թե տվյալ խաղալիքն ում կողմից է արտադրված, որքան ժամկետի  մեջ է և ինչ է ներկայացնում իրենից: Խաղալիքները հիմանակում Չինաստանից են ներկրվում, և դա բացարձակապես չի նշանակում, որ այդ խաղալիքը պետք է վտանգավոր լինի»,- ասաց նա:

Անդրադառնալով գազալցակայանների թեմային`Խալիկյանը նշեց. «Գազալցակայանն ունի իր ստանդարտը: Պետք է  համապատասխանի մեր չափանիշներին, քանի որ  այդ ոլորտը  համարում ենք ռիսկային: Այդ ոլորտն առնչվում է  մարդու կյանքին ու առողջությանը: ԱԳԼՃԿ ոլորտում բավական լուրջ ստուգումներ են իրականացվում,  տեսչությունը  նույնպես հանդիպումներ է կազմակերպել այդ ոլորտի հետ: Հայաստանում գործող բոլոր ԱԳԼՃԿ-ներում տեղադրված են բաշխիչ աշտարակներ, որոնք ցույց են տալիս մթնոլորտային ճնշումը, կիլոգրամը և այլն»,- ասաց նա:

Խալիկյանի խոսքով` Հայաստանի անդամակցությունը ԵՏՄ-ին չի ենթադրում պահանջների թուլացում, բայց նաև տնտեսվարող սուբյեկտների բեռը չավելացնելու փորձ է արվում:

Ըստ Շուկայի վերահսկողության տեսչական մարմնի ղեկավարի` ԱԳԼՃԿ-ները, որոնց գործունեությունը դուրս է օրենքի պահանջներից, ենթարկվում են վարչական տուգանքի, և արգելվում է գործունեությունը` մինչև խախտման վերացումը: