Եվրահանձնաժողովը օրինական միգրացիայի ապահովման առաջարկ է պատրաստում

Եվրամիության` փախստականների ընդունելու հնարավորությունը սահմանափակ է, անդամ երկրներն ի վիճակի չեն միլիոնավոր միգրանտների ընդունել: Այսօր այդ մասին հայտարարել է Եվրահանձնաժողովի նախագահ Ժան Կլոդ Յունկերը` ելույթ ունենալով Լյուքսեմբուրգում` ԵՄ խորհրդարանների խոսնակների համաժողովում. հայտնում է РИА Новости-ն:

Նա շեշտել է Թուրքիայի հետ ձեռք բերված միգրացիոն համաձայնագրի կարևորությունը, մասնավորապես` Հունաստանում փախստականների հարցով ճգնաժամը լուծելու առումով:

Յունկերը հայտնել է, որ Եվրահանձնաժողովը օրինական միգրացիայի ապահովման առաջարկ է պատրաստում, որի նպատակը անօրինական միգրանտների հոսքը կասեցնելն է:

«Հարկավոր է, որ մարդիկ կարողանան օրինական հիմունքներով ներգաղթել Եվրոպա»,- ասել է նա` հավելելով, որ եթե ներկայումս փախստականները Եվրոպա են մտնում լուսամուտից, համապատասխան պայմաններում դա կանեն դռնով: