Քանի Ղարաբաղը նստած չէ բանակցային սեղանի շուրջ, դրանք բանակցություններ չեն. Ռուստամյան

Միայն անտեղյակ մարդը չգիտի, թե ԼՂ կարգավորման գործընթացում ինչ փաստաթղթեր են եղել մինչ հիմա, ինչ փուլային կամ փաթեթային կարգավորում է եղել. ԱԺ ավանդական ճեպազրույցում ասաց ԱԺ ՀՅԴ խմբակցության ղեկավար Արմեն Ռուստամյանը, հիշեցնելով առաջին նախագահի հրաժարականը, երբ Ղարաբաղի հարցով նրա առաջարկը չընդունվեց ոչ միայն ժողովրդի, այլ նաև նրա շրջապատի մի մասի կողմից:

Ըստ պատգամավորի` վաղ է խոսել, թե ինչ բանակցային տարբերակ կառաջարկվի` վերջին իրադարձությունների հետ կապված, բայց երեք սկզբունքները, որոնք դրված են կարգավորման հիմքում, արդեն խոսում է այն մասին, որ  97-98թթ. հետ համեմատելու եզրեր չկան, և համեմատությունն էլ կոռեկտ չէ: Ռուստամյանի խոսքով՝ մենք երկար ժամանակ ունեցել ենք երկու սկզբունք, այն էլ` աղավաղված, մեկը՝ տարածքների վերադարձ` հանուն խաղաղության, որը մերժվեց, մյուսը՝ տարածքներ՝ կարգավիճակի դիմաց, որը նույնպես չընդունվեց:

«Ներկա փուլում հարց ունենք, որը, կարելի է ասել, մի մասով լուծվեց: Այն է՝ չպետք է թույլ տալ, որ Ադրբեջանը տպավորություն ստեղծի, թե կողմ է խաղաղ բանակցություններին: Մեր դիվանագիտական սխալն է եղել, որ, երկակի ստանդարտներ կրելով, Ադրբեջանն աննորմալ ձևով տարել է իր ագրեսիվ քաղաքականությունը: Ուրեմն` եթե բանակցում ենք, գնդացիրներն ու հրետանին պետք է լռեն, եթե այդպես չէ, խոսել բանակցությունների մասին անիմաստ է»,- ասաց պատգամավորը` հավելելով, որ նախ պետք է ամրագրել հրադադարի ռեժիմը, ներդնել հետաքննության մեխանիզմներ, դրանից հետո միայն կարելի է խոսել մի նոր փուլի մասին, այն էլ` հանդիպումների փուլի մասին, ոչ թե` բանակցությունների:

«Բանակցություններ մինչև հիմա տեղի չեն ունեցել, քանի դեռ երեք կողմերի մասնակցությունը չկա: Հանդիպումը երկու նախագահների միջև բանակցություն չէ, այլ հանդիպում՝ բանակցություններ կազմակերպելու համար: Եվ քանի դեռ Ղարաբաղը նստած չէ բանակցային սեղանի շուրջ, ուրեմն դրանք բանակցություններ չեն»,- ասաց Արմեն Ռուստամյանը: