Էրդողանի «բեմադրությունը»

Մայիսի 19-ի` Թուրքիայում Աթաթուրքի, երիտասարդության և սպորտի օրվա կապակցությամբ երկրի նախագահ Ռեջեփ Թայիփ Էրդողանը հյուրընկալվել է A Haber-ին:

Հաղորդման ընթացքում նախատեսված է եղել հարցուպատասխան Էրդողանի և մի խումբ երիտասարդների միջև, ովքեր իրենց մտահոգությունները նախագահին անձամբ հայտնելու և հարցեր ուղղելու հնարավորություն պետք է ունենային: Սակայն հանդիպումը ըստ նախատեսվածի չի անցել:

Ըստ Էրդողանի «բարի ավանդույթի»` նա «վարձել է» մի խումբ երիտասարդների և եթերից առաջ իրեն ուղղվելիք հարցերը հանձնել նրանց: Ունկնդիրներն ու համացանցում հաղորդմանը հետևողները կատարվածի մասին հասկացել են, երբ երիտասարդներից ոչ մեկը ոչ մի դժգոհություն, մտահոգություն կամ սուր հարց չի բարձրացրել: Նրանցից յուրաքանչյուրը բավարարվել է` Էրդողանին գովասանական խոսք ուղղելով:

Էրդողանի հետ երկար սպասված հարցուպատասխանը համացանցում քննադատությունների, ինչպես նաև հեգնանքի է արժանացել: