Էրդողանի «աջը» հանվել է վաճառքի

Թուրքիայի նախագահ Ռեջեփ Թայիփ Էրդողանն իր ելույթներում հաճախ ցուցադրում է յուրահատուկ ժեստեր: Դրանցից ամենահայտնին 4 մատներն են` բութը ծալած: Նրա բնութագրմամբ` դա նշանակում է `մեկ ազգ, մեկ դրոշ, մեկ հայրենիք և մեկ պետություն:

Թուրքիայի նախագահը, ըստ երևույթին, չի բավարարվել` միայն մատները ցուցադրելով: Այդ ժեստի արձանիկներ է պատրաստել տվել` սեփական ձեռքի չափերով: Դրանք պատրաստվել են բրոնզից, արծաթից և ոսկուց ու բաժանվել մեջլիսի պատգամավորներին, այնտեղ աշխատողներին և այցելուներին:

Պատգամավորներին անձեռնմխելիությունից զրկելու վերաբերյալ քննարկումների նիստի անմիջապես հաջորդ օրը «Չորրորդություն» անունը կրող արձանիկը բաժանվել է ընդդիմադիր պատգամավորներին:

Նշվում է, որ արձանիկներն արտադրվել և վաճառքի են հանվել ԱՄՆ նախագահ Բարաք Օբամայի հետ Էրդողանի գրասենյակում կայացած հանդիպումից անմիջապես հետո: Ի դեպ, արձանիկի առաջին օրինակը Էրդողանը զետեղել է իր աշխատասեղանին: