Սեբաստիայում հայկական եկեղեցի է վաճառքի հանվել

Վերջերս Սեբաստիայում (թուրք․ պաշտոնական անվանումը՝ Սվաս) վաճառքի է հանվել Հաֆիք գավառի Սուրբ Աստվածածին հայկական եկեղեցին։ Այդ դեպքի կապակցությամբ Ժողովուրդների հավասարության և ժողովրդավարության կուսակցության (DEM Parti) Մարդինի պատգամավոր Ժորժ Ասլանը հարցում է ուղարկել Թուրքիայի Մշակույթի և զբոսաշրջության նախարար Մեհմեթ Նուրի Էրսոյին։

Այդ մասին հայտնում է Akunq.net-ը՝ վկայակոչելով «Ակօս» շաբաթաթերթի կայքէջը։

Աղբյուրի համաձայն՝ Ասլանի հարցման մեջ մասնավորապես նշված է․

 «-Դուք տեղեկություն ունե՞ք եկեղեցու՝ համացանցի միջոցով վաճառքի հանվելու մասին, որն արտացոլվել է մամուլում։

-Ճի՞շտ է այն ենթադրությունը, թե վերոհիշյալ եկեղեցու սեփականության իրավունքը մի հասարակ անձի է պատկանում։ Եթե ճիշտ է, ապա ինչպե՞ս և ի՞նչ պայմաններում է եկեղեցու սեփականության վկայականը տրվել մի անձի։

-Քանի՞ եկեղեցի և վանք կա, որոնց սեփականության իրավունքը պատկանում է Ձեր նախարարությանը։ ԱԶԿ-ի իշխանության ժամանակաշրջանում անձանց անցած կամ վաճառքի հանված եկեղեցիների և վանքերի թիվը որքա՞ն է։

-Որևէ աշխատանք կատարո՞ւմ եք՝ եկեղեցիների, վանքերի և այլ կրոնական հաստատությունների՝ անձանց կողմից վաճառքն արգելելու ուղղությամբ։

-Աշխատանքներ արվու՞մ են կամ արվելու՞ են՝ սեփականության իրավունքն անձանց տրված եկեղեցիների և վանքերի տերերի դեմ՝ այդ կրոնական հաստատությունները վերադարձնելու ուղղությամբ»։

https://www.agos.com.tr/tr/yazi/30044/sivas-ta-satisa-cikarilan-kilise-icin-soru-onergesi

Թարգմանեց Մելինե Անումյանը

Akunq.net