Տանկիստը 1 կոնֆետը կիսեց 5 ընկերների հետ

Արցախի տանկային անձնակազմի զինծառայող` կապանցի 20-ամյա Վահե Հայրապետյանը հստակ պատասխանում է լրագրողների խաչաձև հարցերին` կարողանալով չհայտնել թեկուզ աննշան գաղտնիք պարունակող տեղեկությունները:

Նրա կարծիքով` ապրիլի սկզբին արտառոց որևէ բան տեղի չի ունեցել, անգամ` Ադրբեջանի նախահարձակ ագրեսիվ գործողությունները նրա համար անսպասելի չեն եղել, քանի որ, ըստ Վահեի, միշտ էլ պատերազմ է եղել, պարզապես այս անգամ մի քիչ ավելի զգալի էին այդ կորուստները:

«Ադրբեջանի գործողությունները ինձ համար բացարձակապես անսպասելի չէին: Ընդամենը զինուժի որոշակի շարժ է տեղի ունեցել այն դիրքերում, որտեղ հայկական կողմը զգալի կորուստներ է տվել, քան նախկինում է տվել: Հայկական կողմը խստորեն է պատժել թշնամուն` կարողանալով համապատասխան հակահարձակ գործողություններ կազմակերպել և պատժել ավելի խիստ, քան սպասում էր հակառակորդը»,- պատմեց Վահե Հայրապետյանը:

Զինվորը շատ է ցավում զոհված հայ զինվորների համար, նրանցից մի քանիսին շատ լավ է ճանաչել և կարծում է, որ ամեն մի հայ զինվորի կյանքը շատ թանկ է հայ ազգի համար: Ինչ վերաբերում է զինվորների  հերոսություններին, նա նշեց, որ հերոսություններ միշտ են եղել և ոչ միայն ապրիլյան լայնածավալ գործողությունների ժամանակ. միշտ էլ դիրքերում հայ զինվորները հերոսանում են իրենց պատրաստվածությամբ:

Հարցին, թե զգո՞ւմ է, արդյոք, հասարակության հոգատարությունը և ուշադրությունը զինվորների հանդեպ, Վահե Հայրապետյանը պատասխանեց. «Իհարկե, զգում ենք, երբ մի զորամասից մեկ այլ զորամաս էինք տեղափոխվում, 6 տարեկան երեխան ձեռքով էր անում մեզ, իսկ մեկ անգամ էլ տեսանք մայրը, փոքրիկին գրկած, մեզ տեսնելով, արտասվեց, մեզ ձեռքով արեց»:

Հարցին, թե  ի՞նչ կոչ կանի արկածախնդիր Ալիևին, նա պատասխանեց. «Նրան ուղղված մեր կոչը նա ստանում է մեր հայ դիրքապահների գործողությունների տեսքով` հասկանալով, թե  ինչպես պետք է վերաբերվել հայերին»:

Կապանցի զինվորը հստակ գիտի իր անելիքը. «Պարտադիր կատարել բոլոր մարտական առաջադրանքները և որքան հնարավոր է` լավ»:

Դիտարկմանը, որ նախահարձակ եղավ Ադրբեջանը, զինվորն արձագանքեց. «Բայց մենք էլ պատրաստված էինք»:

Հ.Գ. Մեկ կոնֆետ ունեի, հարցազրույցի վերջում տվեցի զինվորին, հեռանալիս տեսանք, որ Վահեն բարձրացել է տանկի վրա ու իր հինգ ընկերների հետ փորձում է կիսել այդ մեկ կոնֆետը: 

Մելանյա Մելքումյան