Նախագահի ելույթը վերցված էր այլ առաջնորդի ելույթից. Լարիսա Ալավերդյան

Սերժ Սարգսյանի համար ճառ գրողները կա\'մ փոխվել են, կա\'մ կա խնդիր, թեկուզ` տեխնիկական բնույթի. այսօր լրագրողներին ասաց նախկին ՄԻՊ Լարիսա Ալավերդյանը` անդրադառնալով ՀՀ նախագահ Սերժ Սարգսյանի ելույթին:

«Նախագահի խոսքը պետք է պատրաստեն վերին աստիճանի պրոֆեսիոնալներ, որ հայկական խոսքի ռիթմը պահպանվի: Կներեք, բայց այս ճառը վերցված էր մեկ այլ առաջնորդի ճառից»,- ասաց նա:

Լրագրողները հետաքրքրվեցին` մի՞թե Օբամայի ճառից է վերցված: Լարիսա Ալավեդյանը պատասխանեց, որ դա Օբամայի ճառից չի վերցված, մնում է Պուտինի ելույթը` ակնարկելով, որ Պուտինի ելույթից է վերցված:

Նրա համոզմամբ՝ նախագահի ծրագրային ելույթում չպետք է լինեին հռետորական բնույթի հարցական նախադասություններ: «Պետք է հարգել ՀՀ նախագահի պաշտոնը և ուշադիր գրել ելույթը, ճառը, հակառակ դեպքում՝ սա շատ վիրավորական է»,- ասաց Ալավերդյանը:

Անցնելով ելույթի բովանդակային մասին` նա նշեց, որ  ելույթում ուղերձ կար՝ ուղղված դրսին: Դա Թուրքիային վերաբերող մասն էր, որով նախագահը ցույց է տալիս, որ հայ-թուրքական արձանագրությունների վերաբերյալ գործընթացն այլևս քաղաքական օրակարգում չէ: Ելույթում Սերժ Սարգսյանը ակնարկեց, որ ԼՂ խնդիրը և պատերազմական վիճակի մեջ գտնվելը չպետք է պատճառ լինեն լճանալու համար, այլ նման պայմաններում էլ պետք է փնտրել ուղիներ՝ զարգանալու համար:

Լարիսա Ալավերդյանին դուր չի եկել, որ ելույթում շեշտվում էր կուսակցական քաղաքական կայունության մասին, որովհետև կուսակցական կայունությունը չէ, որ պետք է ապահովի համակարգի կայունությունը:

«Ելույթում չկային ծրագրային կետեր, վերին աստիճանի ընդհանրական, գեղեցիկ  ցանկություններ էին, բայց հարց է առաջանում` հետո ի՞նչ: Անձամբ ես չեմ տեսնում, որ փոփոխությունների փուլ ենք մտել: Անընդհատ խոսվում է կայնության մասին, բայց չի կիրառվում «զարգացում» բառը, այսինքն` այսպես էլ մնա, լավ է: Ի՞նչն էր խանգարում մինչ այժմ փոփոխել այն, ինչի մասին խոսվում է ելույթում: Պատասխանատվության մասին է խոսում, արդարության մասին, դատարանների մասին, սակայն ես ի՞նչ մտածեմ, եթե կան Սուրիկ Խաչատրյանի և նրա ընտանիքի հետ կապված հայտնի դատական որոշումները: Այդ ելույթը զարգացման միտված ելույթ չէր»,- ասաց Լարիսա Ալավերդյանը՝ հավելելով, որ կցանկանար, որ իր երկրի նախագահի խոսքն ավելի լավը լիներ: