Չնայած բժիշկների պայքարին` որոշ հիվանդների կյանքը չի հաջողվել փրկել. Արմեն Մուրադյան

Այսօր լրագրողների հետ զրույցում առողջապահության նախարար Արմեն Մուրադյանը, խոսելով այս օրերի ամենաանհանգստացնող թեմայի`H1N1-ով վարակվածների շրջանում մահացությունների մասին, ասաց, որ բոլոր հիվանդները գտնվում են խիստ հսկողության ներքո: Նախարարը անձամբ մասնակցել է ռիսկային հիվանդների բուժման կոնսիլիումներին, և, չնայած բժիշկների` 10-12 օրվա պայքարին ու աշխատանքին, խիստ նվիրվածությանը, չի հաջողվել որոշ հիվանդների կյանքը փրկել:

Նշենք, որ H1N1-ից մահացության դեպքերը Հայաստանում 11-ն են:

«Դեպքերի մեծ մասը եղել է ուղեկցող հիվանդություններով: Ցավոք, տոնական օրերը երկու տեսանկյունից մեզ խանգարել են` հիվանդների մեծ մասը որոշել էր տոներից հետո դիմել բժիշկներին և ավանդական սերտ շփումները, որոնք նպաստեցին սուր շնչառական հիվանդությունների տարածմանը»,- ասաց նախարարը: