ՀՅԴ-ն, ՕԵԿ-ն ու ԲՀԿ-ն դեմ էին «Գյուղացիական կոոպերացիաների» մասին օրենքի հրատապ ընդունմանը

Այսօր ԱԺ արտահերթ նիստում ԱԺ նախագահ Գալուստ Սահակյանը հայտարարեց, որ կառավարությունը ներկայացրել է որոշման նախագիծ, որով առաջարկում է «Գյուղատնտեսական կոոպերացիաների մասին» օրենքի նախագիծը երրորդ ընթերցմամբ քննարկել երկրորդ ընթերցմամբ ընդունելուց հետո` 24 ժամվա ընթացքում:

Վարման կարգով ելույթ ունեցավ ԱԺ ՀՅԴ խմբակցության պատգամավոր Արծվիկ Մինասյանը` ասելով, որ մի քանի առաջարկներ են արել պատգամավորները` այդ օրենքի հետ կապված, մեկը` որ երկրորդ ընթերցումը հետաձգվի մինչև հաջորդ քառօրյա, որպեսզի այդ ընթացքում հասցնեն քննարկել հարցը, բայց կառավարության կողմից բացատրություն չեղավ, փոխարենը ներկայացվեց հրատապության հարցը: «Դուք ունե՞ք բացատրություն, թե ինչո՞վ է բացատրվում այս հրատապությունը»,- հարցրեց պատգամավորը: 

Վարման կարգով ելույթ ունեցավ նաև ԲՀԿ խմբակցության ղեկավար Նաիրա Զոհրաբյանը: Ըստ նրա` ԲՀԿ-ն նույնպես խնդրել էր հետաձգել հաջորդ ընթերցումը, որովհետև ամեն ինչ փնթի է կազմակերպվել, և իրենք դեմ են քվեարկելու հրատապ ռեժիմին:

ՕԵԿ խմբակցությունը նույնպես առաջարկել էր հետաձգել օրենքի քննարկումը, որ հասցնեն լավ քննարկել այդ` «հեղափոխական» բնութագրվող օրենքը:

Սակայն հրատապության վերաբերյալ կառավարության առաջարկը քաղաքական մեծամասնության քվեարկության շնորհիվ ընդունվեց: