Նախատեսվում է մինչև 6 ամսական երեխաների` բացառապես կրծքով սնուցման ցուցանիշները ավելացնել 25 տոկոսով

Այսօր կառավարության նիստում առողջապահության նախարար Արմեն Մուրադյանը ներկայացրեց որոշման նախագիծ, ըստ որի` պետք է հաստատվի մանուկների և վաղ տարիքի երեխաների անվտանգ ու համարժեք սնուցումն ապահովելու նպատակով կրծքով կերակրելու խրախուսման ազգային ծրագիրը և ծրագրի իրականացման` 2016-2020 թթ. գործողությունների ժամանակացույցը: Ըստ նախարարի` դա բխում է երեխաներին կրծքով կերակրման խրախուսման և մանկական սննդի շրջանառության մասին օրենքի պահանջներից:

Ծրագրի ընդունման հիմնական նպատակն է ապահովել մանուկների առողջ աճը մինչև 2020 թ. և մինչև 6 ամսական երեխաների շրջանում բացառապես կրծքով սնուցման ցուցանիշն ավելացնել 25 տոկոսով: 2016-2020 գործողություններն ուղղված են լինելու բժշկական հաստատություններում, բացառապես կրծքով սնուցմանն ուղղված, բարենպաստ պայմանների իրականացմանը, բուժանձնակազմի հմտությունների զարգացմանը, հանրային իրազեկման աշխատանքներին և այլն:

«Այսօր «Մանկան բարեկամ» կոչումը, որը տալիս է ՅՈՒՆԻՍԵՖ-ը, ունի 32 կազմակերպություն, աշխատանքների արդյունքում պետք է հասնենք մինչև 40-ի, որ կարողանանք Ժնևից այդ հավաստագիրը ստանալ, և ապահովել վերոհիշյալ ցուցանիշները: Գործողությունների ծրագիրն իրականացվելու է միջգերատեսչական  համագործակցության շրջանակներում` առողջապահության նախարարության, մարզպետարանների և  Երևանի քաղաքապետարանի համագործակցությամբ, միջազգային և հասարակական կազմակերպությունների ներգրավմամբ»,- ասաց նախարարը:

Կառավարությունը հաստատեց այս նախագիծը: