Միևնույն է, անպայման կլինեն մարդիկ, ովքեր կդժգոհեն նոր դասագրքերից. Աշոտյան

ՀՀ ԿԳ նախարար Արմեն Աշոտյանը հանդիպում է ունեցել մի խումբ գյումրեցի դպրոցականների հետ, ովքեր համագործակցում են «Վորդ Վիժն» կազմակերպության հետ: Հանդիպման առաջարկությունը եղել է աշակերտներինը, որին էլ ընդառաջել է նախարարը: 
Աշակերտները  նախարարին դիմել են  իրենց մտահոգող մի շարք հարցերով,  որոնք վերաբերել են դպրոցական կրթական ծրագրերին, բուհական ընդունելության հարցաշարերը ներառող շտեմարաններին, Գյումրիում գործող բուհերի գործունեությանը և  մի շարք այլ խնդիրների:

Աշակերտներից մեկը հարց է բարձրացրել, որ Գնահատման և թեստավորման կենտրոնի հրապարակած շտեմարանների ու դասագրքերի միջև կան անհամապատասխանություններ: Նախարարն առաջարկել է  ասվածը հիմնավորել կոնկրետ օրինակներով և փաստարկված ներկայացնել ԿԳՆ:  «Եթե դուք ներկայացնեք կոնկրետ օրինակներ, ես խոստանում եմ հարցը քննարկել ԳԹԿ-ի հետ և տալ լուծում»,- նշել է  նախարարը:

Մեկ այլ աշակերտ էլ հարց է բարձրացրել, որ, օրինակ, ֆիզիկայի 10-րդ դասարանի դասագրքում կան բանաձևեր, որոնք սովորելու համար անհրաժեշտ է մաթեմատիկայից տիրապետել ածանցյալի թեմային, մինչդեռ ածանցյալը ընդգրկված է մաթեմատիկայի 11-րդ դասարանի 2-րդ կիսամյակի ծրագրում:  Նշելով, որ խնդիրն ընդունելի է, նախարարը ներկայացրել է դասագրքերի հրատարակման ընթացակարգը: Աշոտյանի պարզաբանմամբ՝ դասագրքերը հրատարակվում են մրցութային կարգով՝ հեղինակները ընտրվում են մասնագիտական հանձնաժողովի կողմից, բացի այդ՝ մինչ հրատարակվելը  դրանք նաև մասնագիտական կարծիքի և դիտողությունների համար ուղարկվում են բոլոր դպրոցներին:

«Ամեն դեպքում ձեր բարձրացրած հարցը վերաբերում է միջառարկայական կապերի համադրելիությանը, որը մասնագիտական քննարկման խնդիր է: Բարձրացված խնդիրները նկատի ունենալով՝ մենք հիմա կանգնած ենք կրթական ծրագրերի վերանայման անհրաժեշտության առջև: Վստահ եղեք, որ եթե անգամ մենք ձեր մատնանշած բոլոր խնդիրները հաշվի առնենք, միևնույն է, անպայման կլինեն  մարդիկ, ովքեր կդժգոհեն նոր դասագրքերից: Մասնագիտական հանրույթը  Հայաստանում միատարր չէ,  չկա որևէ հարց, որի վերաբերյալ  մասնագետները համակարծիք են: ԿԳՆ-ն փորձում է լսել բոլոր կարծիքները և գտնել մասնագիտական կոմպրոմիսի, ոսկե միջինի տարբերակը»,- նշել է Աշոտյանը և հավելել, որ, անկախ  ներկայացված խնդիրներից, չկա  այնպիսի  հանգամանք, որը կարող է իրական խոչընդոտ հանդիսանալ աշակերտի բարձր առաջադիմության համար: