Մարդիկ գյուղատնտեսական աշխատանքներով են զբաղված, տեղյակ չեն սահմանադրական բարեփոխումներից. մարզպետ

Սահմանադրական հանրաքվեն տեղի կունենա դեկտեմբերի 6-ին: Քարոզարշավի պաշտոնական մեկնարկն արդեն տրված է: Yerkir.am-ը զրուցեց Արմավիրի մարզպետ  Աշոտ Ղահրամանյանի հետ` տեղեկանալու` մարզում քարոզարշավը ո՞ր փուլում է: Ղահրամանյանի խոսքով`մարզում դեռևս ընթանում են նախապատրաստական աշխատանքներ: «Աշխատանքներ են ընթանում` կապված անվճար  տեղեր հատկացնելու հետ: Խոսքն անվճար պաստառներ կպցնելու մասին է: Անվճար տեղեր հատկացվում են Արմավիր և Էջմիածին քաղաքներում»,- ասաց մարզպետը:

Ըստ նրա` մարդիկ գյուղատնտեսական աշխատանքներով են զբաղված, տեղյակ չեն սահմանադրական բարեփոխումներից: «Մեր աշխատանքների կարևոր մասն է նաև մարդկանց իրազեկելը: Շտաբների ձևավորումը մոտակա ժամանակներում կավարտվի, և հետո արդեն քարոզիչներն իրենց աշխատանքները կսկսեն»,- նշեց Ղահրամանյանը:

Yerkir.am-ի հարցին`անձամբ հանդիպումներ կունենա՞ ժողովրդի հետ` բացատրելու համար, թե ինչ են իրենցից ներկայացնում սահմանադրական բարեփոխումները, մարզպետը պատասխանեց. «Ժամանակը կգա, էդ հարցն էլ իր պատասխանը կստանա: Իսկ, ընդհանուր առմամբ, այդ ամենին, իհարկե, կունենամ իմ մասնակցությունը:

Ղահրամանյանը հավելեց, որ եթե ժողովուրդը հարցնի` ի՞նչ են իրենցից ներկայացնում  բարեփոխումները, ինչ հարց էլ տան, իրենց պատասխանները կստանան: «Քարոզիչներն առանձին են, կազմակերպիչները` առանձին: Երբ շտաբը ձևավորվի, ըստ այդմ էլ յուրաքանչյուր աշխատող իր հանձնարարականները կունենա` ով ինչ գործով է զբաղվելու»,- ասաց նա: