Թուրքիայի հայ համայնքը ներկայացնող միակ հաստատությունը պատրիարքարանն է. Պոլսի պատրիարքարան

Պոլսի հայոց պատրիարքարանը հայտարարություն է տարածել, որում նշվում է, որ, պատրիարքարանից բացի, մեկ այլ հաստատություն կամ անձնավորություն համայնքի անունից հայտարարություն անելու կամ քայլեր կատարելու իրավունք և իրավասություն չունի. տեղեկացնում է Ermenihaber-ը:

«Թուրքիայի հայերի պատրիարքարանը՝ Թուրքիայի հայ համայնքի հոգևոր կենտրոնը, համայնքը ներկայացնող և նրա անունից որոշումներ կայացնող միակ ատյանն է: Ըստ կայուն ավանդույթի՝ համայնքին հետաքրքրող հարցերի շուրջ արված հայտարարությունները, որոնցում ներկայացվում է վերջինիս կարծիքը, պատրիարքարանին վերաբերող իրողություն է: Պատրիարքարանից բացի, որևէ կառույց կամ անհատ համայնքի անունից հայտարարություն անելու կամ քայլեր կատարելու իրավունք և իրավասություն չունի»,- նշված է հայտարարության մեջ:

Հայտարարության պատճառ են դարձել վերջին օրերին սոցցանցերում տեղադրված հայտարարությունները, որոնցում օգտագործվել է հայերի անունը:

Ըստ թուրքական timeturk.com կայքի՝ գրավոր հայտարարության մեջ նշվում է, որ մարդիկ ազատ են իրենց մտքերն արտահայտելու մեջ, սակայն դրանք պետք է արտահայտեն միայն կոնկրետ մարդկանց դիրքորոշում: Ինչպես նաև անձնական կարծիք արտահայտող հայտարարությունները պետք է սահման ունենան և չխախտեն հասարակական կարգը: