Հայաստանի և Ադրբեջանի միջև ռասսիզմի խնդիր չկա. Միշել Պլատինի

ՈւԵՖԱ-ի նախագահ Միշել Պլատինին, ով ոչ պաշտոնական այցով ժամանել է Երևան,  Ավանի ակադեմիայում հանդիպեց լրագրողների հետ:

«Եթե չվերընտրվեի ՈւԵՖԱ-ի նախագահի պաշտոնում, դժվար թե գայի Հայաստան: Բուլղարիա գնալուց առաջ որոշեցի այցելել Հայաստան,  քանի որ վաղուց չէի տեսել իմ ընկեր Ռուբենին: Մենք որևէ կոնկրետ ծրագիր չունենք, քանի որ ֆեդերացիաների աշխատակիցների հետ հաճախ ենք տեսնվում ՈւԵՖԱ-ի գրասենյակում:  

Մենք ունենք աշխատակից, ով հաճախ գալիս է Հայաստան՝ ֆուտբոլը զարգացնելու համար: Այժմ   մեծ ջանքեր ենք գործադրում,  որպեսզի Եվրոպայում տաղանդներ աճեն:   Շատ լավ է, որ ՈւԵՖԱ-ն հովանավորում է,  որպեսզի այսպիսի դաշտեր լինեն, բայց նաև լավ կլիներ, որ այս խաղադաշտերում մարզվեն լավ ֆուտբոլիստներ»:

Խոսելով    ռասսիզմի դեմ պայքարի, և Հայաստան-Ադրբեջան քաղաքական հակամարտության մասին, ՈւԵՖԱ-ի նախագահն ասաց.

«Այդ խնդիրը կա ամբողջ աշխարհում: Մենք պարզապես փորձում ենք ինչ-որ ձևով լուծել դրանք: Մենք անում ենք ամեն ինչ, որպեսզի որևէ անախորժություն  չունենանք նման խնդիրների հետ կապված: Հայաստանի և Ադրբեջանի միջև ռասսիզմի խնդիր չկա, դա քաղաքական հարց է և կախված չէ ՈւԵՖԱ-ից»:

 -Թուրինի Յուվենթուսը 12 տարի անց խաղալու է Չեմպիոնների լիգայի եզրափակչում: Ի՞նչ զգացողություններ ունեք, եթե հաշվի առնենք, որ գավաթը հնարավոր է հանձնեն Ձեր հարազատ թիմին:

-Դժվար է պատասխանել այս հարցին: Հուսով եմ, որ մրցավարը չի սխալվի ի օգուտ «Յուվենթուս»-ի,  և բոլորը չեն ասի, թե իմ մեղավորությունն էր (ժպտում է): Լավ է, որ իտալական թիմը  կրկին բարձունքում է: Հուսով եմ՝  կհաղթի լավագույնը, որովհետև ես չեզոք եմ և բոլորի նախագահն եմ:

-ԵՎՐՈ-2016-ը նոր ձևաչափով է անցկացվելու. որո՞նք են  առանձնահատկությունները:

  - Եվրոպայի առաջնությունն  ավելի է ընդլայնվելու: Այն քաղաքները, որոնք կընդունեն առաջնությունը, ավելի շատ կլինեն:    Իմ կարծիքով՝ Եվրոպայում ունենք 24 ուժեղ հավաքական: Մրցակցությունն ավելի բարձր է լինելու: Նախկինում շատերը  կարծում էին, որ չեն հասնելու եզրափակիչ փուլ, իսկ այժմ ձևաչափն այլ է,  ինչի նորհիվ  պետք է նաև մարզիչները վստահություն ունենան:

ՈւԵՖԱ-ի նախագահի` լրագրողների հետ հանդիպման տեսանյութը` մի փոքր ուշ: