Որքանո՞վ է ճիշտ՝ հաշվի չառնել տեղական հանրաքվեի արդյունքները. Արծվիկ Մինասյանը մտահոգություններ ունի

Այսօր ԱԺ լսումներում, երբ քննարկվում էր համայնքների խոշորացման հարցը, ԱԺ ՀՅԴ խմբակցության պատգամավոր Արծվիկ Մինասյանը հարցեր ուղղեց տարածքային կառավարման փոխնախարար Վաչե Տերտերյանին:

«Սահմանադրությամբ հղում են կատարում, որ համայնքները, հանրության շահերից ելնելով, կարող են միացվել կամ առանձնացվել: Ինչպե՞ս է չափվում հանրության շահը, ո՞վ է չափում, ի՞նչ չափորոշիչներով: Որքանո՞վ է տրամաբանական, տեղին ու ճիշտ տեղական հանրաքվեի արդյունքները հաշվի չառնելը կամ այդպիսի փորձ անելը, արդյո՞ք դա նպաստում է երկրում ժողովրդավարության զարգացմանը:

Պիլոտի մասին երբ խոսում ենք, ինչո՞ւ մեկ պիլոտ էլ չի կիրառվում շրջանային կառավարման վերաբերյալ, ինչո՞ւ ենք վերցրել միայն փնջային կառավարման մոդելը, որպեսզի համեմատության մեջ տեսնեն, թե որ մոդելն է ավելի արդյունավետ: Սահմանադրական փոփոխությունների գործընթացի ներկա փուլում որքանո՞վ է տրամաբանական նման հապճեպ քայլ կատարելը` չսպասելով սահմանադրական փոփոխություններին, որովհետև սահմանադրական փոփոխությունները ենթադրում են տեղական ինքնակառավարման մոդելի փոփոխություն»,- հարցրեց Արծվիկ Մինասյանը:

Վաչե Տերտերյանը նշեց, որ խոշորացումը ենթադրել է ավելի շատ մասշտաբների փոփոխություն, քան բովանդակության: «Միգուցե բովանդակային փոփոխություն էլ կանենք հետագայում, պիլոտների մեջ այդ կարգի խնդիրներ դեռ չենք նախատեսել: Շրջանային մոդելը չենք հակադրում փնջային տարբերակին: Փորձագիտական մակարդակում դուրս ենք եկել փնջային մոդելի վրա: Պիլոտային ծրագրերը չեն բացառում շրջանային մոդելը: Պատրաստ ենք քննարկել շրջանայինի մոդելը, պարզապես այն ռիսկ ունի, որ տեղական ինքնակառավարումը կարող է նսեմացվել, և ավելի մեծ ակնկալիքներ կառաջանան` պետական միջամտության հետ կապված, որ համայնքները կդառնան կենտրոնին նայող միավորումներ»,- ասաց փոխնախարարը:

Վաչե Տերտերյանը նշեց, որ, օրինակ, Դիլիջանը քաղաքային միջավայր ու շրջանային տրամաբանություն ունի: Եվ եթե Դիլիջանը  արդյունավետ աշխատեց շրջանայինի մոդելում, ապա կընտրվի այդ մոդելը:

«Ապագայում անպայման լինելու է շրջանային մոդելը, սա պրոցես է, որից դժվար է խուսափել, որովհետև դա նշանակում է դեմ գնալ բնական տենդենցներին»,- ասաց նա՝ հավելելով, որ կա ՀՀ նախագահի դիրքորոշումը, որ ամեն ինչ պետք է անել դրական արդյունքով:

Փոխնախարարը նշեց, որ 1996թ. վարչատարածքային բաժանումը իրականացվել է` հանրության շահերից ելնելով: Եվ հիմա կառավարման տեսանկյունից ավելի էֆեկտիվ է փնջային տարբերակը: Խոսելով հանրաքվեի մասին` նա կարծիք հայտնեց, որ չպետք է անել հանրաքվեն, որովհետև կարծիք իմանալու համար պարտադիր չէ հանրաքվե անել, հազար ու մի տեխնոլոգիա կա` կարծիքը որոշելու համար: «Վստահ եմ, որ հանրաքվեի արդյունքները, բացի էմոցիոնալ մասից, ոչ մի հիմնավորում չեն կարող ունենալ»,- ասաց Վաչե Տերտերյանը:

Արծվիկ Մինասյանն արձագանքեց, որ պետք է ձեռնպահ մնալ տեղական հանրաքվեի ինստիտուտը նման փորձության տանելուց, և եթե հանրաքվեի կարծիքը բացասական լինի, ապա կառավարությունը պետք է ձեռնպահ մնա նման առաջարկն իրագործելուց: