Եվրոպական ամենաթուրքաբնակ երկրի նախագահի աննախադեպ ելույթը

ԱԺ փոխնախագահ Հերմինե Նաղդալյանը շատ կարևոր հանգամանք է համարում Գերմանիայի նախագահ Իոահիմ Գաուկի այն ելույթը, որով նա ճանաչում է 1915թ. դեպքերը որպես ցեղասպանություն:

Yerkir.am-ի հետ զրույցում Հերմինե Նաղդալյանը կարծիք հայտնեց, որ Գերմանիայի նախագահի այդ ելույթը պարզապես աննախադեպ էր ու Գերմանիայի վերաբերմունքի ամենացցուն օրինակը:

Հիշեցնենք, որ ապրիլի 30-ին Գերմանիայի Բունդեսթագը քննարկելու և քվեարկելու է Հայոց ցեղասպանությունը ճանաչելու մասին հարցը:

«Այդ ելույթով շատ հնարավոր կասկածների ու ժխտումների ճանապարհը փակվեց, որովհետև Գերմանիայի նախագահը խոսեց ոչ միայն Թուրքիայի պատասխանատվության մասին, այլև Գերմանիայի համապատասխանատվության մասին ևս: Ես չեմ կարող ասել, թե Գերմանիայի Բունդեսթագն ինչ դիրքորոշում կունենա գալիք քվեարկության ժամանակ, դա քվեարկությունը ցույց կտա, բայց որ առաջին անգամ է ազդեցիկ ատյանից նման հայտարարություն հնչում, դա պետք է փաստել»,- ասաց Հերմինե Նաղդալյանը:

Նա նաև նշեց, որ Գերմանիայի նախագահի այդ ելույթը պետք է դիտարկել եվրոպական ամենաթուրքաբնակ երկրի տեսանկյունից, և որ Գերմանիան Թուրքիայի մշտական քաղաքական բարեկամն է եղել բոլոր ալյանսներում` սկսած Առաջին համաշխարհային պատերազմից:

«Գերմանիայի արխիվները իսկապես զինված են այն տեղեկատվությամբ, որի մասին նշել է Գերմանիայի նախագահը: Ես վստահ եմ, որ այն, ինչ հնչեցվեց նրա կողմից ոչ թե մեկ անձի էմոցիոնալ ելույթ էր, այլ երկրի նախագահի փաստական վերլուծության հիման վրա արված վերլուծություն»,- ասաց Հերմինե Նաղդալյանը: