Արքեպիսկոպոս Ասատուրյանը նամակ է հղել արքայազն Չալրզին` հիշեցնելով Ցեղասպանության հարցում Անգլիայի պատասխանատվության մասին

Մեծ Բրիտանիայի արքայազներ Չարլզի և Հարիի` ապրիլի 24-ին Թուրքիա այցելելու որոշումից հետո Իրաքի հայկական եկեղեցու արքեպիսկոպոս Ավագ Ասատուրյանը նամակ է հղել նրանց` նշելով Հայոց ցեղասպանության հարցում նրանց պատասխանատվության մասին. տեղեկացնում է «Ակօս»-ը:

Նամակում արքեպիսկոպոսն ասել է. «Այս միջոցառումը ցույց է տալիս, թե ինչպես է քաջալերվում մի ազգի հիշողությունները ոչնչացնելը»:

Ասատուրյանը, որ Չանաքքալեի միջոցառումները որակել է «դաժանության և ժխտողականության հաղթանակ», հիշեցրել է 1915 թվականի իրադարձությունները «մարդկության դեմ հանցանք» որակող պետությունները, որից մեկը հենց Անգլիան է եղել:

Նշելով նաև, որ Ուիսնթոն Չերչիլը 1915 թվականի կոտորածները «ցեղասպանություն» է որակել, արքեպիսկոպոսը գրել է. «Անգլիան խոստացել էր պատժել Ցեղասպանության մեղավորներին, իսկ 21-րդ դարում պարգևատրվում է մի ողջ ազգի ցեղասպանողը»:

Հիշեցնելով նաև Հիտլերի հայտնի` «Ո՞վ է հիշում հայերի բնաջնջումը» խոսքը, Ասատուրյանն ասել է. «Ես ցանկանում եմ, որ արքայազն Չարլզը հիշի պատմությունն էլ, այս խոսքն էլ»: