Իմ սխալը և դավաճանությունը. Րաֆֆի Հովհաննիսյանը խոստովանեց

Այսօր Ազատության հրապարակում հրավիրված քաղաքացիական ժողովի ժամանակ Րաֆֆի Հովհաննիսյանը հիշեց բանտարկված Շանթ Հարությունյանին, Վոլոդյա Հովհաննիսյանին, Վարդան Պետրոսյանին` նրանց համարելով քաղբանտարկյալներ:

«Իմ սխալը և դավաճանությունն այն էր, երբ ես անցյալ տարի ապրիլի 9-ին մոռացա մեր պետական դրոշը: Ես դա ընդունում եմ և երբեք չեմ մոռանալու»,- ասաց նա: Հովհաննիսյանի խոսքով` Հայոց ցեղասպանության 100-ամյա տարելիցի նախաշեմին ինքը պահանջում է, Արցախի մարտահրավերի դիմաց, ճանաչում, հատուցում, արդարություն:

«Որևէ տեղ չենք հասնելու, եթե Հայաստանում քաղաքացին չապրի արժանապատիվ ու արժանավայել: Այս պայքարը դրա համար է, այս պայքարը ոչ մեկ չի կասեցնելու, այս պայքարը անշրջելի է: Որակը ծնելու է քանակ: Վաղը մենք կլինենք Վանաձորում և Գյումրիում: Մեկ հոգի կգա, թե` հազար, կարևոր չէ, որովհետև ես գնահատում եմ յուրաքանչյուր քաղաքացու ներդրումը»,- ասաց Րաֆֆի Հովհաննիսյանը: