Որոշ մարդիկ անշնորքություն են անում. մարզպետը` Եղնիկի բնակիչների խնդրի մասին

Արագածոտնի մարզի Եղնիկ գյուղի բնակիչներն արդեն բացել են Երևան-Գյումրի մայրուղին: Այս մասին yerkir.m-ին տեղեկացրեց Արագածոտնի մարզպետ Սարգիս Սահակյանը:

Նրա խոսքով` մարզի երկու գյուղերը` Շղարշիկն ու Եղնիկը, սնվում են խմելաջրի նույն աղբյուրից: «Որոշ մարդիկ կան` անշնորքություն են անում, գնում են, ջուրը փակում են»,- ասաց մարզպետը և հավելեց, որ ինքը հանձնարարել է` գնալ և ջրի բաժանումը կարգավորել, ինչը և արդեն արվել է:

Դիտարկմանը, թե պարտադիր գյուղացիները պետք է ճանապա՞րհ փակեն, նման կե՞րպ իրենց բողոքն արտահայտեն, որ հարցը լուծվի, մարզպետը պատասխանեց. «Դիմել են, իհարկե, հիմա էլ հարցը լուծվել է: Ինչ-որ մեկը գնացել է, ջուրը փակել է, տարել է իրենց գյուղի վրա»: