Պետական բաժնեմասով եւս մեկ ընկերություն կլուծարվի

Կառավարության վաղվա նիստում կքննվի «Սեպտիկշին» փակ բաժնետիրական ընկերության բաժնետերերի ընդհանուր ժողովում ընկերության լուծարման մասին որոշմանը հավանություն տալու մասին որոշման նախագիծը:

Համաձայն որոշման նախագծի' կառավարությունը բնապահպանության նախարարին կհանձնարարի  ապահովել   պետական բաժնեմասի լիազորված ներկայացուցչի մասնակցությունը «Սեպտիկշին» փակ բաժնետիրական ընկերության բաժնետերերի ընդհանուր ժողովում ընկերության լուծարման և այդ գործընթացից բխող որոշումների ընդունման համար:

Թե ինչու է լուծարվում ընկերությունը, որպես հիմնավորում, կառավարության կողմից նշվում է, թե 2014թ. հունվարի 9-ի «Հայաստանի Հանրապետության կառավարության 2014 թվականի գործունեության միջոցառումների ծրագիրը և գերակա խնդիրները հաստատելու մասին» թիվ 10-Ն որոշմամբ հաստատված թիվ 2 հավելվածի 59-րդ կետով ՀՀ կառավարությանն առընթեր պետական գույքի կառավարման վարչությունը պետք է ճշգրտի ՀՀ պետական ռեգիստրի պետական միասնական գրանցամատյանում գրանցված՝ մինչև 50 տոկոս պետական բաժնեմաս ունեցող ընկերությունների ցանկը, իրականացնի այդ ընկերությունների գույքի կազմի, պարտավորությունների, արտադրական հնարավորությունների, գործունեության հեռանկարների վերլուծություն և արդյունքում ՀՀ կառավարություն ներկայացնի համապատասխան առաջարկություններ, այդ թվում` նաև լուծարման վերաբերյալ: 

Պետական գույքի կառավարման վարչությունը, ըստ ներկայացված հիմնավորումների,  գրություններով դիմել է լիազորված պետական կառավարման մարմիններին՝ մինչև 50 տոկոս պետական բաժնեմաս ունեցող ընկերությունների ցանկը, ինչպես նաև այդ ընկերություններում պետական բաժնեմասի հետագա պահպանման նպատակահարմարության վերաբերյալ դիրքորոշում հայտնելու համար:

«ՀՀ բնապահպանության նախարարության տրամադրած տեղեկատվության համաձայն «Սեպտիկշին» ՓԲԸ-ում պետական բաժնեմասը կազմում է 40 տոկոս: Հաշվի առնելով, որ ընկերությունը ստեղծվելով 2010թ.-ին մինչև օրս գործունեություն չի ծավալել, ՀՀ բնապահպանության նախարարությունը ընկերությունում պետական բաժնեմասի հետագա պահպանումը գտնում է ոչ նպատակահարմար և ներկայացրել է ընկերության ոչ պետական բաժնեմասի սեփականատիրոջ՝ «Վիլլաշին» ՍՊԸ-ի առաջարկությունը՝ «Սեպտիկշին» ՓԲԸ-ի լուծարման վերաբերյալ»,- նշվում է որոշման հիմնավորումներում:

Ուշագրավ է, որ բնապահպանության նախարարության տեղեկատվության համաձայն' ընկերությունը գույք, այլ ակտիվներ, ինչպես նաև պարտավորություններ չունի, այնինչ` այդ կարգավիճակով գոյատևել է 4 տարի: Հետևաբար, նաև որոշակի' թեկուզ նվազագույն ծախսեր առաջացրել են: Ու թե ինչքան ծախսեր է առաջացրել պետական բյուջեի համար այս ընկերությունը, ինչ տեսակի գործունեություն պետք է ծավալեր, որ չի արել, գործունեություն չծավալելու արդյունքում պետությանն ինչքան կամ ինչ վնաս է պատճառել, քանի որ նախատեսված գործունեությունը չծավալելը նույնպես վնաս է նշանակում, նախագծի հիմնավորումներում չի նշվում: