«Նորֆոլկ»-ը կլուծարվի, փոխարենը կստեղծվի պետական մասնակցությամբ բաժնետիրական ընկերություն

Կառավարության նիստից առաջ ՊԵԿ նախագահ Դավիթ Անանյանը լրագրողների հետ զրույցում անդրադարձավ «Նորֆոլկ Քոնսալթինգ» կազմակերպության վերաբերյալ հարցերին:

Հիշեցնենք, որ ԱԱԾ-ն տնտեսական բնույթի հանցագործությունների դեմ պայքարի շրջանակներում քրեական գործ էր հարուցել, ձերբակալվել էր 4 անձ, հայտարարվել էր, որ քրեական գործով վնասը, ըստ նախնական հաշվարկի, կազմել է շուրջ 7 միլիոն դոլար։  Այդ կազմակերպությունը մաքսազերծման պրոցեսում համակարգում էր կարգոների հետ աշխատանքը:

ՊԵԿ նախագահը նշեց, որ այս պահին «Նորֆոլկ» ընկերությունը գտնվում է լուծարման գործընթացում, ՊԵԿ-ի ամիջական վերահսկողության ներքո է:

Դավիթ Անանյանն ընդգծեց,  որ ժամանակավորապես «Նորֆոլկ»-ն իրականացնում է այն նույն գործառույթները, ինչ իրականացրել է, մինչև պետական մասնակցությամբ բաժնետիրական ընկերություն ստեղծվի, որը կիրականացնի նույն գործառույթը, սակայն ավելի թափանցիկ և հանրության համար ավելի բաց: ՊԵԿ նախագահը տեղեկացրեց, որ կիլոգրամով մաքսազերծումը չի համապատասխանում ԵԱՏՄ օրենսդրությանը, և պետական մասնակցությամբ բաժնետիրական ընկերության իմաստն այն է, որ պետությունն իր վրա վերցնի այդ պատասխանատվությունը: Դրանով կկարգավորվի ֆիզիկական անձանց ձեռնարկատիրական գործունեությունը, այսինքն` փոքր կազմակերպությունները «Նոֆոլկ»-ի ծառայություններից այլևս չեն օգտվի, կօգտվեն միայն այն ֆիզիկական անձինք, ովքեր վերավաճառողներ են: