«Փաստաբանության մասին» օրենքի դրույթը հակասահմանադրական ճանաչվեց

Սահմանադրական դատարանը քիչ առաջ հրապարակեց «Փաստաբանության մասին» օրենքի 45.6 հոդվածի սահմանդրականության վերաբերյալ իր որոշումը:

Եզրափակիչ մասում մասնավորապես նշվում է հետևյալը. ««Փաստաբանության մասին» օրենքի 45.6 հոդվածի առաջին մասը այն մասով ու մեկնաբանությամբ, որով արգելափակվում է ավելի բարձր կրթական աստիճանի` մագիստրոսի ն համարժեք որակավորում ունեցող անձի Փաստաբանական դպրոցի ունկնդիր դառնալու իրավունքը, ճանաչել Սահմանադրության 1-ին, 3-րդ և 43-րդ հոդվածի 2-րդ մասի պահանջներին հակասող և անվավեր»:

Հիշեցնենք, որ «Փաստաբանության մասին» օրենքի 45.6-րդ հոդվածի սահմանադրականությունը վիճարկվում էր Գևորգ Սլոյանի դիմումի հիման վրա: Հիշյալ նորմի համաձայն`փաստաբանական դպրոցի ունկնդիր կարող է լինել այն գործունակ ֆիզիկական անձը, որն ունի իրավաբանական կրթության բակալավրի կամ դիպլոմավորված մասնագետի որակավորման աստիճան: 

Այսինքն` այսուհետև մագիստորական աստիճան ունեցող անձին արգելելը Փաստաբան դպրոց ընդունել, հակաօրինական է: Սահմանադրական դատարանի որոշումներն օրինական ուժի մեջ են մտնում հրապարակման պահից: Որոշումը ՍԴ կայքում կտեղադրվի առաջիկա երկու օրվա ընթացքում: