«Ժառանգությունը» դուրս կգա՞ չորսի ֆորմատից

«Ժառանգություն» կուսակցությունում չի քննարկվել այն հարցը, որ եթե ձևավորվի ազգային համաձայնության կառավարություն, կուսակցությունը մաս կկազմի՞ այդ կառավարությանը. Yerkir.am-ի հետ զրույցում ասաց ԱԺ «Ժառանգություն»  խմբակցության ղեկավար Ռուբեն Հակոբյանը:

Հարցին՝ արդյո՞ք  «Ժառանգության»  համար վարչապետի ընդունելի թեկնածու է Հովիկ Աբրահամյաննը, պատգամավորը պատասխանեց. «Մենք մեր օրակարգում չենք քննարկել ոչ մեր կողմից, առավել ևս` որևէ քաղաքական ուժի կողմից առաջադրված թեկնածուի վերաբերյալ հարց»:

Ինչ վերաբերում է «Ժառանգության» տարածած այն հայտարարությանը, թե քառյակի ձևաչափի համար կարևոր պայման է ոչ իշխանական չորս ուժերի առաջնորդների միջև հանդիպումը, և արդյո՞ք դա չի նշանակում, որ եթե չորս ուժերի առաջնորդների հանդիպումը չկայանա, «Ժառանգությունը» դուրս է գալու չորսի ֆորմատից, Ռուբեն Հակոբյանը պատասխանեց. «Այդ հարցը կա մեր օրակարգում, և առաջիկայում մենք այդ հարցը քննարկելու ենք»: