Շանթ Հարությունյանի կալանքը մնաց անփոփոխ

Այսօր ՀՀ վերաքննիչ դատարանում մոտ երկու ժամտևած դռնփակ նիստից  հետո դատավոր Արարատ Պետրոսյանը անփոփոխ թողեց Շանթ Հարությունյանի կալանքը ևս երկու ամսով երկարացնելու` Կենտրոն և Նորք-Մարաշ վարչական շրջանների ընդհանուր իրավասության դատարանի կայացրած որոշումը:

Լրագրողների հետ զրույցում Շանթ Հարությունյանի փաստաբան Ինեսա Պետրոսյանը նշեց, որ քննիչը որևէ հիմք չի ներկայացրել այն մասին, որ Շանթ Հարությունյանը  կարող է խոչընդոտել նախաքննությանը:
Նա նշեց, որ կալանքի որոշումը հիմնավորվում է նրանով, որ Հարությունյանը կարող է ազդեցություն ունենալ վկաների վրա: Ի դեպ` այս գործով անցնող հիմնական վկաները ոստիկանության աշխատակիցներ են:

Նշենք, որ նույն գործով անցնող մի քանի այլ ամբաստանյալների պաշտպանների բողոքները Վերաքննիչ դատարանը նույնպես մերժել է և կալանքների երկարաձգումը մնացել է անփոփոխ:

Շանթ Հարությունյանի պաշտպանը նշեց, որ երեկ այցելել է «Դատապարտյալների հիվանդանոց» ՔԿՀ-ում գտնվող իր պաշտպանյալին: Նա հայտնել է, որ երիկամում քար ունի և բուժվում է: