Գյումրիի նախկին քաղաքապետի դստեր փեսացուի սպանության գործով դատավճիռը մնաց անփոփոխ

Քրեական վերաքննիչ դատարանն այսօր անփոփոխ է թողել Գյումրիի նախկին քաղաքապետի դստեր փեսացու Կարեն Եսայանի սպանության գործով առաջին ատյանի դատարանի դատավճիռը: Այս մասին տեղեկանում ենք «Փաստինֆո» գործակալությունից:

Առաջին ատյանի դատարանն ամբաստանյալ Հարություն Սարգսյանին մեղավոր էր ճանաչել ՀՀ քրեական օրենսգրքի 104-րդ հոդվածի 1-ին մասով՝ սպանություն, և 188-րդ  հոդվածի 1-ին մասով՝ ապօրինի ձեռնարկատիրություն, և դատապարտել 15 տարվա ազատազրկման:

Ամբաստանյալը  նաև զրկվել էր որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից 1 տարի ժամկետով:

Դատավճռով Հարություն Սարգսյանի միջոցներից պետք է բռնագանձվի  768.194  ՀՀ դրամ հօգուտ պետբյուջեի՝ որպես պատճառված վնասի հատուցում, իսկ տուժողի իրավահաջորդ Անահիտ Իսկանդարյանին քաղհայցի իրավունք  է վերապահվել: 

Գործը վերաքննիչ դատարանում քննվել է պաշտպանական կողմի բողոքի հիման վրա: Պաշտպանական կողմը միջնորդում էր ամբողջությամբ բեկանել ՀՀ Շիրակի մարզի ընդհանուր իրավասության դատարանի՝ 12.03.2014թ-ի դատավճիռը և  ամբողջովին կարճել գործի վարույթը: