Ոստիկանության հայտարարությունը ''Սարդարապատ'' թանգարանի միջադեպի վերաբերյալ

ԳԱԼԱ-ն երեկ հրապարակել էր տեղեկություն, համաձայն որի` Սարդարապատի հերոսամարտի հուշահամալիր, Հայոց ազգագրության և ազատագրական պայքարի պատմության ազգային թանգարանի տնօրեն Կարեն Արիստակեսյանը վիճաբանել է թանգարանի աշխատակցուհիների հետ, ինչից հետո նրանցից երկուսին շտապ բուժօգնության մեքենաներով տեղափոխել են հիվանդանոց: ԳԱԼԱ-ի աղբյուրների հաղորդմամբ` տեղի է ունեցել ծեծկռտուք: 

Քիչ առաջ ոստիկանությունը դեպքի վերաբերյալ տարածեց պաշտոնական հաղորդագրություն. «Դեկտեմբերի 14-ին, ժամը 16:40-ին հիվանդանոցից ոստիկանության Արմավիրի բաժնում հաղորդում է ստացվել, որ «ձախ ծնկան հոդի կապանների գերձգվածություն, կրծքավանդակի ձախ կեսի սալջարդ» ախտորոշմամբ բուժօգնության է տեղափոխվել 1953 թ. ծնված Անիկ Մ.-ն, որը հիվանդանոցում հայտարարել է, որ իրեն ծեծի են ենթարկել: Մեկնած օպերատիվ խումբը պարզել է, որ նույն օրը, ժամը 15.00-ի սահմաններում 1969 թ. ծնված Կարեն Ա.-ն, աշխատանքային խնդիրների պարզաբանման ժամանակ բռունցքով հարվածներ է հասցրել Անիկ Մ.-ին և պատճառել վնասվածքներ: Նշանակվել է դատաբժշկական փորձաքննություն: Կատարվում է հետաքննություն»: