Հարցաքննվել են պաշտոնատար անձինք. Քննչական կոմիտեն մանրամասներ է հայտնում Ցեղասպանության թանգարանի հարակից տարածքում թղթերի այրման վերաբերյալ

Ցեղասպանության թանգարանի շենքի հարակից տարածքում մետաղե տարայի մեջ թղթերի այրման վերաբերյալ հրապարակված տեսագրության առնչությամբ Ոստիկանությունից ստացված հաղորդման առթիվ մայիսի 23-ին նախաձեռնվել է քրեական վարույթը և կատարվում է նախաքննություն: «Արմենպրես»-ի փոխանցմամբ՝ այս մասին հաղորդագրություն է տարածել Քննչական կոմիտեն:

Հաղորդագրության մեջ նշվում է, որ նախաքննության ընթացքում հարցաքննվել են մի շարք անձինք, այդ թվում՝ «Հայոց ցեղասպանության թանգարան ինստիտուտ»-ի ղեկավար, ինչպես նաև ֆոնդի պահպանության համար պատասխանատու պաշտոնատար անձինք և աշխատակիցներ։

Այս պահին վարույթով առկա տվյալներով ՝ տեսանյութում երևացող թղթերը եղել են սևագրեր կամ թանգարանային առարկաներից կատարված պատկերների լուսանկարներ, որոնք օգտագործվում են տարբեր ժամանակավոր, շրջիկ ցուցադրությունների ընթացքում։

Վարույթի շրջանակում ստացված տվյալներով՝ շրջանառվող տեսանյութերում երևացող որևէ թանգարանային առարկա, որը հաշվառված է թանգարանի հիմնական ֆոնդում, չի այրվել, որևէ նման առարկա չի ոչնչացվել:

Նախաքննությունը շարունակվում է՝ անհրաժեշտ միջոցները ձեռնարկվում են ստացված տվյալները վարույթի շրջանակներում ստուգելու, անձանց գործողություններին վերջնական իրավական գնահատական տալու նպատակով։

Օրերս համացանցում տեսանյութ էր տարածվել, որի հեղինակը պնդում էր, որ Հայոց ցեղասպանության թանգարանի աշխատակիցներն այրում են Հայոց ցեղասպանության վերաբերյալ նյութեր։ Թանգարանի տնօրինությունը լուրը հերքել էր: