Դուք էլ լինեիք մեծամասնություն. ՀՀԿ-ական պատգամավորի ցինիզմը

Կուտակային կենսաթոշակային համակարգը մեկ տարով հետաձգելու վերաբերյալ քննարկումների ժամանակ ԱԺ ՀՀԿ խմբակցության պատգամավոր Հակոբ Հակոբյանը կարծիք հայտնեց, որ չորս ընդդիմադիր քաղաքական ուժերը շատ էին ոգևորվել, որ մեկ փաստաթուղթ են ստորագրել: «Հետաքրքիր ուրախություն էր»,- նշեց պատգամավորը:

Նա ասաց, որ բոլորը քննադատում են, թե այս կենսաթոշակային համակարգը վատն է, այդ դեպքում պետք է բարեփոխումներ իրականացնել: «Բա ո՞վ պետք է անի այդ բարեփոխումները: Դուք էլ եղեք քաղաքական մեծամասնություն, դուք էլ արեք բարեփոխումներ, ո՞վ է ձեր ձեռքից բռնել»,- ասաց պատգամավորը` հավելելով, որ ռեֆորմ չանելը Հայաստանի համար հավասար է հանցագործության, իսկ ռեֆորմը ժամանակ է պահանջում:

«Ես երբեք չեմ ասել, թե պրոբլեմ չի լինելու, ես անհանգստացած եմ բոլորից շատ, որ խնդիրները հարթվեն: Ինձ նաև դուր է գալիս, որ պառլամենտում վերջերս սկսել են շատ խոսել, պառլամենտը շատ խոսելու համար է»,- ասաց պատգամավորը: