Զարուհին ու Նիկոլը հո էդ մարդկանց չէին ուտելու. Գալուստ Սահակյան

ԱԺ ՀՀԿ խմբակցության ղեկավար Գալուստ Սահակյանի խոսքով՝ իրենք չեն խուսափել արտահերթ նիստին մասնակցելուց, պարզապես բովանդակային քննարկումների խնդիր չունեն, դրա համար էլ չեն մասնակցում:

Դիտարկմանը, թե դա իր միանձնյա որոշումն է, պատգամավորը պատասխանեց. «Քաղաքական մեծամասնությունն ուժեղ է, իր խոսքն անցնում է, մենք ասել ենք, ինչ ուզում եք արեք: Ինչի՞, ես Սասունցի Դավի՞թն եմ, ի՞նչ եմ, որ 70 պատգամավորին կարողանամ արգելակել»:

Հարցին, թե ՀՀԿ-ն նիստը տապալվել է Վարդան Այվազյանի դստեր հարսանիքի պատճառո՞վ, Սահակյանը պատասխանեց. «Հարսանիքներն առավոտյան չեն լինում»:

Պատասխանելով դիտարկմանը, թե սա նշանակում է, որ  քաղաքական փոքրամասնություններն այլևս չեն կարողանա արտահերթ նիստ գումարել, նա ասաց. «Դրա համար պետք է փոքրամասնությունները փոքր-փոքր խոսեն և փոքր-փոքր պայքարեն»:

Անդրադառնալով ընդդիմադիր պատգամավորներին նոյեմբերի 5-ի գործով կալանավորվածներին հանդիպել թույլ չտալու շուրջ ծավալված քննարկումներին` Սահակյանը նախ նշեց, որ իրավաբանների կռվին չի ցանկանում մասնակցել, հետո հավելեց. «Օրենքն ապահովում է պատգամավորի մուտքը ցանկացած հիմնարկ, եթե դրանք օպերատիվ գործողությունների հետ կապված չէին: Նույնիսկ օրենքը թույլ չի տալիս, պետք է թողնեին. Զարուհին ու Նիկոլը հո էդ մարդկանց չէին ուտելու»: