Մաքսային միության հարցը` կառավարությունում

Մաքսային միությանն անդամակցելու նպատակով իրականացվելիք առաջնահերթ միջոցառումների ցանկը կառավարության այսօրվա նիստում հավանության արժանացավ:

Ըստ նախագծի` Մաքսային միությանը միանալու համար անհրաժեշտ է Մաքսային միության շրջանակներում գործող փաստաթղթերին համադրել ՀՀ համապատասխան իրավական դաշտը եւ ՀՀ կողմից ստորագրված միջազգային պայմանագրերը, նախապատրաստել համապատասխան բանակցային առաջարկությունները: 

Էկոնոմիկայի փոխնախարար Կարինե Մինասյանը հայտնեց, որ Հայաստանի ու Ռուսաստանի նախագահների նախորդ տարվա հանդիպումներից մեկի ժամանակ որոշվել է ստեղծել Մաքսային միությանն անդամակցելու հնարավորությունները քննարկող աշխատանքային խումբ, դրանից հետո վարչապետի հանձնարարականով ստեղծվել էր ռուսական կողմի հետ աշխատող աշխատանքային խումբ:

Փոխնախարարը տեղեկացրեց, որ աշխատանքային խումբը երեք պաշտոնական, բայց բազմաթիվ ոչ պաշտոնական հանդիպումներ է ունեցել: Նա հայտարարեց, որ ներկայիս պայմաններում, երբ հստակ է, որ Հայաստանը միանալու է Մաքսային միությանը, անհրաժեշտություն է առաջացել ստեղծել բանակցային փաթեթ եւ իրականացնել նախապատրաստական աշխատանքներ: Որոշումն ընդունված է: