Գաղտնիք չկա. Էդուարդ Նալբանդյան

Կառավարությանն ուղված հարցուպատասխանի ժամանակ ԱԺ «Ժառանգություն» խմբակցության ղեկավար Ռուբեն Հակոբյանը ԱԳ նախարար Էդուարդ Նալբանդյանից հետաքրքրվեց, թե երբ են հրապարակվելու Մաքսային միության եւ Ասոցացման համաձայնագրերի բովանդակությունները: Հակոբյանը նշեց, որ այնպիսի համապետական հարց, ինչպիսին Մաքսային միությանն անդամակցել-չանդամակցելն է, լուծվում է մեկ, երկու, երեք պաշտոնյաների սենյակներում: Իհարկե, ըստ Հակոբյանի, հնարավոր է, որ ամբողջ քաղաքական ինտելեկտը հավաքված լինի մեծամասնության շարքերում, բայց գոյություն ունի փոքրամասնություն, որի հետ էլ պետք է հաշվի նստել: Հակոբյանը նշեց, որ վաղը Բիշքեկ է մեկնում, եւ այնքան ինֆորմացված չէ Մաքսային միությանը վերաբերող հարցերին, որ պետք է «երեւի շպիոնություն խաղա, որ իմանանք ինչ է կատարվում մեր եւ ձեզ հետ»:

Ի պատասխան, ԱԳ նախարարը շտապեց Սահմանադրությունից մեջբերում անել, թե որոնք են նախագահի լիազորությունները: Նալբանդյանը հայտարարեց, որ միջազգային պայմանագրերը չեն հրապարակվում նախաստորագրումից  առաջ, անգամ դեպքեր են լինում, որ ստորագրումից հետո են հրապարակվում: «Գաղտնիք չկա այդ պայմանագրերի մեջ»,- վստահեցրեց նախարարը եւ նշեց, որ Մաքսային միության վերաբերյալ կոնկերտ փաստաթուղթ այս պահին գոյություն չունի, դրանք կարող են լինել բանակցությունների ընթացքում: Նախարարը տեղեկացրեց, որ բանակցությունները կսկսվեն հոկտեմբերի վերջին-նոյեմբերի սկզբին:

Իր հերթին, Ռուբեն Հակոբյանը զարմանք հայտնեց, որ, իր հարցին ի պատասխան, նախարարը Սահմանադրության հոդվածներն է մեջբերում, որին տեղյակ են ինչպես ինքը, այնպես էլ ԱԺ-ում նստած պատգամավորները: Պատգամավորը նշեց, որ Նալբանդյանից նման պատասխան չէր սպասում, հետո ընդգծեց, որ իր հարցն ավելի լուրջ էր, որ, փաստորեն, «քաղաքական կլուբն» է որոշում այս ազգի ճակատագիրը: Ռուբեն Հակոբյանը նաեւ վստահեցրեց, որ շատ լավ գիտի, թե երբ են հրապարակվում համաձայնագրերն ու միջազգային փաստաթղթերը, բայց սա այն դեպքը չէ, խոսքը վերաբերում է համապետական հարցի, եւ միջազգային պրոտոկոլը պետք չէ ամեն անգամ մեջբերել:

Նալբանդյանը եւս մեկ անգամ վստահեցրեց, որ երբեւէ որեւէ գաղտնիք չեն պահել. երկրի նախագահը, ԱԳՆ-ն թափանցիկ քաղաքականություն են վարում: ԱԳ նախարարը հայտարարեց, որ ՀՀ-ի որոշման եւ պատճառներին ըմբռնումով են մոտենում եվրոպացի գործընկերները, եւ որ պետք է շարունակել մերձեցումը ԵՄ-ի հետ: