Գագիկ Խաչատրյանը չի՞ գրանցում աշխատողներին. ''Ժողովուրդ''

Հայաստանում գործող «Մեգա սպորտ» խանութների ցանցերում մարդիկ աշխատում են առանց օրինական գրանցում ունենալու. գրում է «Ժողովուրդ»-ը:

Խանութի աշխատակիցները «Ժողովուրդ»-ին դժգոհել են, որ խնդրի առաջ են կանգնել, քանի որ ընկերության տնօրինությունը հրաժարվում է իրենց գրանցել որպես օրինական աշխատողներ: Ընկերությունն անգամ հրաժարվում է տեղեկանքներ տրամադրել աշխատակիցներին:

Սակայն «Մեգա սպորտ» խանութների ցանցի տնօրենի տեղակալ Արտաշես Մելքումյանը «Ժողովուրդ»-ի հետ զրույցում հերքել է լուրը: «Այդ տեղեկությունները սխալ են, քանի որ նրանք, ովքեր աշխատում են մեզ մոտ՝ խանութում, իրենք բոլորն էլ գրանցված են: Չէ՛, չէ՛, հաստատ բոլորն էլ գրանցված են, ու խնդիր չկա»,- հայտարարել է նա:

Ի դեպ, «Ժողովուրդ»-ի տեղեկություններով՝ «Մեգա սպորտ» խանութների ցանցը պատկանում է ՀՀ պետական եկամուտների կոմիտեի նախագահ Գագիկ Խաչատրյանին, թեև նրա խոսնակ Նելլի Մանուչարյանը թերթի հետ զրույցում ասել է, թե Գ. Խաչատրյանը բազմիցս հայտարարել է, որ ինքը բիզնեսով չի զբաղվում: