Anonymous-ը կոտրել է Թուրքիայի նախագահի կայքը

Anonymous հաքերային խումբը հարձակում է գործել Թուրքիայի նախագահ Աբդուլլահ Գյուլի կայքի, նաեւ մի շարք այլ կառավարական կայքերի վրա, այդ թվում` վարչապետի եւ իշխող կուսակցության. տեղեկացնում է Hurriyet-ը: Այդպիսով` հաքերները աջակցել են ցուցարարներին, ովքեր պահանջում են Էրդողանի կառավարության հրաժարականը վերջին օրերին կատարված դեպքերի կապակցությամբ:

«Էրդողանը պետք է հիշի Եգիպտոսի նախագահ Հոսնի Մուբարաք ճակատագրի մասին եւ հրաժարական տա, քանի դեռ իրադրությունը վերահսկողությունից դուրս չի եկել»,- ասվում է տեսանյութում, որը տեղադրվել է խմբի կողմից  Youtube-ում:

Բողոքի ակցիաները Թուրքիայի մի շարք քաղաքներում շարունակվում են արդեն 5 օր: Ցուցարարները պահանջում են իշխանություններից հրաժարվել Ստամբուլի Թաքսիմ հրապարակի Գեզի այգու ոչնչացման եւ դրա տեղում առեւտրի կենտրոն կառուցելու մտքից: