Պռոշյանի գյուղապետը զոհվել է հրազենային վնասվածքից

Պռոշյանի գյուղապետ Հրաչ Մուրադյանի մահվան պատճառը հրազենային վնասվածքն է: Շրջանառվող վարկածը, թե գյուղապետը հանկարծամահ է եղել, հերքվում է, քանի որ գյուղապետի գլխին՝ աջ ականջի մոտ, հրազենային մահացու վնասվածք է հայտնաբերվել: Գյուղացիները նշում են, որ հնչել է երկու կրակոց: Սակայն տարածքի հետազոտման ժամանակ պարկուճ դեռեւս չի հայտնաբերվել:

Հրաչ Մուրադյանի դին Կոտայքի մարզի Պռոշյան գյուղի գյուղապետարանի մոտ հայտնաբերվել էր այսօր առավոտյան:

Հրաչ Մուրադյանը ծնվել էր 1963թ. հուլիսի 1-ին, Պռոշյան գյուղում, ավարտել տեղի միջնակարգ դպրոցը, բարձրագույն կրթություն ստացել Երեւանի Մեսրոպ Մաշտոցի անվան համալսարանում: Պռոշյան համայնքի ղեկավարն էր 2005 թվականից: Ամուսնացած էր, ուներ երկու դուստր եւ երկու որդի:

Նա Արցախյան ազատամարտի հերոսներից էր: Լեգենդար Պետրոս Ղեւոնդյանի հետ անցել է ազատամարտի բոլոր ճակատներով՝ Շահումյանից մինչեւ Ֆիզուլի: Հրաչ Մուրադյանը 1990 թվականից Դաշնակցության անդամ էր: