Ցեղասպանության հարցը պետք է բարձրացնել միջազգային դատական ատյաններում

Հայոց ցեղասպանության հարցը պետք է բարձրացնել նաեւ միջազգային դատական ատյաններում. այսօր Երեւանում լրագրողների հետ հանդիպման ժամանակ ասել է գերմանացի իրավապաշտպան, հայագետ, «Ճանաչում աշխատանքային խումբ` ընդդեմ Ցեղասպանության, հանուն միջազգային ըմբռնման» կազմակերպության ղեկավար Թեսա Հոֆմանը:

Ընդգծելով, որ Ցեղասպանության ճանաչման հարցը կախված է ոչ միայն քաղաքական, այլ նաեւ դատական գործընթացներից, նա նշել է, որ թեեւ Ցեղասպանությունն իրականացնողները ողջ չեն, սակայն հարցը վերաբերում է նաեւ նրանց հետնորդներին, թուրքական պետությանը: Այդ կապակցությամբ նա հնարավոր է համարում միջազգային դատարանի դատավճռի կայացումը, որը հակադարձ իրավական ուժ կունենա:

Հոֆմանի խոսքերով` կարեւոր է նաեւ այն, թե որքանով է Թուրքիան համարվում Օսմանյան կայսրության իրավահաջորդը: Թեեւ թուրքական իշխանությունները հայտարարում են, թե Թուրքիայի Հանրապետությունը որեւէ կապ չունի Օսմանյան կայսրության հետ, Հոֆմանը մատնանշել է, որ այդ երկիրը, մասնավորապես` իշխող «Արդարություն եւ զարգացում» կուսակցությունը բացահայտ նեոօսմանական քաղաքակություն է վարում:

Միաժամանակ, նա նշել է, որ միջազգային դատական ատյաններ դիմելիս խնդիրներ կառաջանան, քանի որ Հայաստանը չի վավերացրել Հռոմի ստատուտը: